წერეთლის გამზირზე რამდენიმე საათის წინ „თიბისი ბანკის“ წერეთლის გამზირზე მდებარე ფილიალის დაყაჩაღება სცადეს. პოლიციისთვის ამ დროისთვის დაუდგენელი პირები ბანკში დაახლოებით 14:00 საათზე შეიჭრნენ. ბოროტმოქმედებმა ბანკიდან თანხის წაღება ვერ მოახერხეს.
მომხდარიდან რამდენიმე წუთში თვადასხმა მოხდა იქვე მდებარე ”საქართველოს ბანკზეც.” ბანკში ერთი პირი შეიჭრა გაძარცვის მიზნით, ადგილზე პოლიცია რამდენიმე წუთში გამოცხადდა და მძარცველთან მოლაპარაკებას აწარმოებდა, თუმცა მცდელობა უშედეგოდ დასრულდა და მძარცველმა მისი აყვანის სპეცოპერაციისას თავი მოიკლა.
პირი, რომელმაც “საქართველოს ბანკში” სიცოცხლე თვითმკვლელობით დაასრულა, სავარაუდოდ, ცოტა ხნის წინ, “თი-ბი-სი ბანკის” გაძარცვას შეეცადა.
“საქართველოს ბანკი” წერეთლის გამზირზე მდებარე ფილიალში მომხდარ შემთხვევასთან დაკავშირებით განცხადებას ავრცელებს.
როგორც განცხადებაშია აღნიშნული,დაფიქსირდა ყაჩაღობის მცდელობა.
”ფილიალში შეჭრიდან და საგანგაშო ღილაკზე თითის დაჭერიდან ოპერატიულად პოლიცია ადგილზე მივიდა და შეჭრილ პირს დანებება შესთავაზა, თუმცა მან თვითმკვლელობის მიზნით გასროლა განახორციელა, რაც სავალალო შედეგით დასრულდა. ”საქართველოს ბანკი” ღრმა მწუხარებას გამოთქვამს მომხდარ ფაქტთან დაკავშირებით”,- ნათქვამია განცხადებაში.
შსს განცხადებით, ადგილზე მუშაობს პოლიცია და მიმდინარეობს შესაბამისი საგამოძიებო მოქმედებები ბოროტმოქმედების დადგენის მიზნით.
არის თუ არა კავშირი „თიბისი ბანკის“ დაყაჩაღების მცდელობასა და ამავე გამზირზე მდებარე „საქართველოს ბანკის“ დაყაჩაღების მცდელობას შორის, ჯერჯერობით უცნობია.