ოკუპირებულ ტერიტორიაზე სოფელ არცევის ტყის მასივში გაჩენილი ხანძარი გორის სოფლებს უახლოვდება. ხანძრის კერიდან დასახლებული პუნქტი ყველაზე ახლოს, 500 მეტრში ოკუპირებული სოფელი ოტრევია. ხანძრის კერასთან ასევე ახლოსაა სოფელ ფლავისმანის სასაფლაო. – აქ ცეცხლი სასაზღრო ბანერამდე ას მეტრშია მოსული.
ამ დროისთვის ცხინვალიდან არცევის მიმართულებით გასული სახანძრო მანქანები ცეცხლის ლოკალიზებას ცდილობენ, თუმცა ხანძარმა ფოთლოვანი ტყისა და ბუჩქნარის საკმაოდ დიდი ტერიტორია მოიცვა.
შიდა ქართლის გუბერნატორის კახა სამხარაძის განცხადებით, გამყოფი ხაზის პერიმეტრზე სარწყავი წყლის არხი მდებარეობს, შესაბამისად, საქართველოს ცენტრალური ხელისუფლების მიერ კონტროლირებადი დასახლებული პუნქტების მიმართულებით ხანძრის გავრცელებს საფრთხე ამ ეტაპზე არ არსებობს, თუმცა არის გარკვეული რისკები, რომ თუ ხანძრის ლოკალიზება დროულად არ მოხერხდება, ცეცხლი არ გავრცელდეს იმ მიწის ფართობზეც, რომელსაც საქართველოს ცენტრალური ხელისუფლება აკონტროლებს. გუბერნატორის განცხადებით მობილიზებულია შსს, 3 სახანძრო-სამაშველო ბრიგადა. “იმ შემთხვევაში თუ გავრცელების საფრთხე გაჩნდა. ჩვენ მზად ვართ ცეცხლის ლოკალიზაციისთვის – განაცხადა მან.
ამ წუთებში ცნობილი ხდება, რომ ე.წ. ოსეთის ხელისუფლება დათანხმდა საქართველოს მთავრობას ხანძრის სალიკვიდაციო სამუშაოებში ქართველი მეხანძრე-მაშველები ჩაერთონ. – ამის შესახებ მედიას საქართველოს პარლამენტის უშიშროების და უსაფრთხოების კომიტეტის თავმჯდომარემ ირაკლი სესიაშვილმა განუცხადა. იგი არ აკონკრეტებს ზუსტად ვისთან მოხდა მოლაპარაკებები და ამბობს, რომ ამის შესახებ განცხადება ხვალ გაკეთდება.
.ქართული მხარე ხანძრის სალიკვიდაციო სამუშაოებში ცოტახანში ჩაერთვება.
