ქვეყნის ეკონომიკის კუთხით არსებულ პრობლემებს და გამოწვევებს დღეს „ევროპული საქართველოს“ ზუგდიდის ოფისში სპეციალური ბრიფინგი მიუძღვნეს, რომელიც მედიისთვის პარტიის ქალაქ ზუგდიდის მერობის კანდიდატმა გამართა. ლელა ქებურიას შეფასებით, სოფლის მეურნეობის მიმართულებით რთული ვითარებაა შექმნილი. მისივე თქმით, არსებული ხელისუფლების პირობებში სიღარიბის ზრდა განსაკუთრებით სოფლად მცხოვრებლებს დაეტყოთ, რადგან შემოსავალი შემცირებულია, ხარჯი კი გაზრდილი. ქალაქ ზუგდიდის მერობის კანდიდატმა დღეს გამართულ ბრიფინგზე საქსტატის მონაცემები მოიშველია და განაცხადა, რომ წლიდან წლამდე ნათესი ფართობების რაოდენობა მცირდება.
ლელა ქებურიას განცხადებით, ასევე იკლო მსხვილფეხა რქოსანი პირუტყვის და ფრინველთა სულადობამ. ქალაქ ზუგდიდის მერობის კანდიდატის თქმით, შედეგად შემცირებულია ხორცის, რძის და კვერცხის წარმოება.
ლელა ქებურიას თქმით, ევროპული საქართველო მოუწოდებს ხელისუფლებას შეწყვიტოს მავნებლური პოლიტიკა და პარალელურად სთავაზობს გამოსავალს.
ქალაქ ზუგდიდის მერობის კანდიდატმა დღეს ასევე რეგიონში გავრცელებული მავნებლების შესახებ ისაუბრა. ლელა ქებურიას თქმით, ამის გამო სოფლებში მძიმე ვითარებაა, რადგან განადგურებულია თხილის მოსავალი და იგივე სიმინდის კულტურასაც ემუქრება. მან ხელისუფლებას ამ მიმართულებით უფრო ქმედითი მუშაობისკენ მოუწოდა.