დევნილები ბინების განაწილების პროცესში უსამართლობაზე საუბრობენ.
დევნილებისთვის ბინები არა ქულების, არამედ ქრთამის საფუძველზე ნაწილდება. – ეს განცხადებები გააკეთეს დღეს იძულებით გადაადგილებულმა პირებმა ქუთაისში გამართულ აქციაზე.
მათ დილიდან გადაკეტეს გზა პარლამენტის მიმდებარე ტერიტორიაზე და იძულებით გადაადგილებულ პირთა, განსახლებისა და ლტოლვილთა მინისტრ სოზარ სუბარის ჩასვლა და მათთან შეხვედრა მოითხოვეს.
ადგილზე გზის გახსნა საპატრულო პოლიციის თანამშრომლებმა სცადეს, რასაც ხმაური და დაპირისპირება მოყვა.
"იმ ხალხს არ აძლევენ ბინებს, რომლებსაც მართლა ეკუთვნით. როდემდე მოვითმინოთ ამდენი უსამართლობა?! დღეს გზა გადავკეტეთ, ხვალ გადავისხამთ ბენზინს და თავს დავიწვავთ", – აცხადებენ დევნილები.