სოციალურ ქსელში ვრცელდება ინფორმაცია, რომ ოლიგარქმა ბიძინა ივანიშვილმა ზუგდიდში სხვა რამდენიმე ბერხესთან ერთად სოფელ დარჩელის სკოლის ეზოში მდგარ ასწლოვან ცაცხვსაც დაადგა თვალი.
,,ჩემი სკოლის ეზოში დგას საუკუნოვანი ცაცხვის ხე. ხიხოს მოსწონებიაო… ხელი არ წაგიცდეთ… ახლა ამას ბევრი წაიკითხავს, ვინც შეატყობინებთ მთავრობას. მარინა ცარციძეს გადაეცით, სკოლის დირექტორს. ღმერთმა ნუ ქნას ეს სიმართლე იყოს და ამის აღსრულებაზე იფიქროს ვინმემ.
ადგილობრივი თვითმმართველობის არჩევნები კი არა, სეირის მოწმეები გახდებით….'' – წერს მაია კალანდია.
,,ოდიში ნიუსი'' ცდილობს ინფორმაცია გადაამოწმოს სკოლის დირექტორთან მარინა ცარციძესთან, მაგრამ ეს ამ დრომდე ვერ მოხერხდა. არ არის გამორიცხული, ის არც იყოს საქმის კურსში.
ადგილობრივები ადასტურებენ, რომ ,,ბიძინას ხალხმა'' დაიარა მთელი დარჩელი და ევაჭრა კიდეც რამდენიმე მოსახლეს მათ ეზოებში მდგარი ხეების თაობაზე.
ერთია, როცა ხეების ყიდვას ოლიგარქი კერძო მოქალაქეებისგან ცდილობს (ამ შემთხვევაში კერძო საკუთრებასთან გვაქვს საქმე და კანონი მფლობელს თავისი ქონების გაყიდვას არ უკრძალავს, თუმცა არსებობს მორალური პრინციპებიც, დაუწერელი კანონები) და მეორე, როცა ვაჭრობა მიდის სკოლის საკუთრებაზე – ამ შემთხვევაში ეს სახელმწიფოს საკუთრებაა და მოსახლეობას სრული უფლება აქვს წინ აღუდგეს ამ ვანდალურ ფაქტს.
,,ჩვენს ცაცხვს არავის გავატანთ'' – ამბობენ ადგილობრივები, მათ შორის ამ სკოლის აღზრდილები და დღევანდელი მოსწავლეები და მათი მშობლები.