ახალციხის და ახალქალაქის სოფლებში სვირსა და კორხში ხანძარია, ცეცხლი ტყეს გაუჩნდა.
შინაგან საქმეთა სამინისტროს საგანგებო სიტუაციების მართვის სამსახურის ცნობით, ადგილზე მობილიზებულია სახანძრო-სამაშველო ჯგუფები და ხანძრის ლოკალიზაციისთვის შესაბამისი სამუშაოები მიმდინარეობს. მდგომარეობა ართულებს ის, რომ ცეცხლი მიუვალ ადგილას გაჩნდა. მეხანძრეებთან ერთად სამუშაოებში ადგილობრივი მოსახლეობაცაა ჩართული. ამ ეტაპზე უცნობია ხანძრის მასშტაბი და გავრცელების ზუსტი არეალი.
დღეს ხანძარი იყო გორის გვირაბთანაც. ბალახს წაკიდებული ცეცხლის ჩაქრობაზე სამი სახანძრო-სამაშველო ბრიგადა მუშაობდა. მეხანძრეებმა ხანძარის ლიკვიდაცია უკვე მოახერხეს. დამწვარია დაახლოებით 1 ჰექტარი ფართობი. ხანძრის გამომწვევი მიზეზები ჯერჯერობით უცნობია.