საგანგებო სიტუაციების მართვის სააგენტოს ინფორმაციით ბორჯომის ხეობაში ცეცხლი ძირითადად ლიკვიდირებულია და ადგილზე მხოლოდ მცირე კერები რჩება. ამ დროისთვის მათი ჩაქრობის სამუშაოები მიმდინარეობს.
სამუშაოებს ცოცხალი ძალა აწარმოებს.
ადგილზე არიან ქართველი მეხანძრეები და მაშველები, სამხედრო ძალები, მოსახლეობა, რაც შეეხება მეზობელი ქვეყნების მიერ დასახმარებლად გამოგზავნილ ცოცხალ ძალას და სახმელეთო ტექნიკას , სტიქიის ზონაში რჩებიან აზერბაიჯანული და სომხური სახანძრო ბრიგადები, თუმცა, აზერბაიჯანულმა ბრიგადებმა ბანაკის დაშლა უკვე დაიწყო. რა რაოდენობის ცოცხალი ძალა დარჩება სტიქიის ზონაში, სავარაუდოდ დღის განმავლობაში, საგანგებო შტაბის სხდომაზე გაირკვევა.
შსს-ს საგანგებო სიტუაციების სამსახურის ცნობით, ადგილზე არიან ზერბაიჯანული და ბელარუსული ვერტმფრენები და საჭიროების შემთხვევაში ცეცხლის ქრობაში ჩაერევიან.
სამწუხაროდ, დღეს დილით ქართული ვერტმფრენი წყალსატევიდან წყლის ამოღების დროს ჩამოვარდა, ეკიპაჟი მცირე დაზიანებებით თბილისშია გადაყვანილი. თავად ვერტმფრენი უკვე ამოყვანილია წყლიდან ამწეების მეშვეობით, თუმცა მწყობრიდან არის გამოსული.
მიმდინარეობს ვერტმფრენის ჩამოვარდნის იზეზების დადგენა. ადგილზე იმყოფებიან ექსპერტ-კრიმინალისტები.