თბილისის საქალაქო სასამართლოს გადაწყვეტილებით რკინიგზის დეპარტამენტთან გამართულ აქციაზე დაკავებული ათივე პირი სხდომათა დარბაზიდან გათავისუფლდა.
სასამართლო პროცესი 8 სექტემბერს გაგრძელდება. სხდომის გადადება დაკავებულების ადვოკატებმა მოითხოვეს. – დაცვის მხარემ საქმის მასალებისა და მტკიცებულებების გაცნობისთვის დრო ითხოვა.
სასამართლომ არ დააკმაყოფილა ადვოკატების მიერ დაყენებული მეორე შუამდგომლობა საქმეების გაერთიანების შესახებ. სასამართლო, ისევე, როგორც დღეს დაკავებულთა საქმეებს მეორე სხდომაზეც ცალ-ცალკე განიხილავს.
შეგახსენებთ, გუშინ საქართველოს რკინიგზასთან რკინიგზელთა საპროტესტო აქციის მონაწილეებსა და სამართალდამცავებს შორის დაპირისპირება მოხდა. სიტუაცია რკინიგზის ცენტრალურ ოფისთან მას შემდეგ დაიძაბა, რაც აქციის მონაწილეთა ნაწილმა საქართველოს რკინიგზის ოფისის ფოიეში შესვლა და შიმშილობის აქციის იქ გაგრძელება სცადა. მათ ამის უფლება სამართალდამცველებმა არ მისცეს, რასაც ჩხუბი მოჰყვა. დაკავებულია აქციის ათამდე მონაწილე.