საქართველოს შინაგან საქმეთა სამინისტროს სსიპ საგანგებო სიტუაციების მართვის სააგენტოს ცნობით წაღვერში ტყის მასივს ცეცხლი უკიდია.
ცეცხლი სოფელ დაბის სიახლოვეს, იმ ადგილზეა გაჩენილი, სადაც 2008 წელს რუსთ-საქართველოს ომის დროს ხანძარი იყო.
ადგილზე სახანძრო-სამაშველო ჯგუფები უკვე მუშაობენ. მობილიზებულია ასევე პოლიცია. მეხანძრეებს ცეცხლის ლიკვიდაციაში ადგილობრივი მოსახლეობაც ეხმარება.
რაც შეეხება სახანძრო სამუშაოებში ვერტმფრენის ჩართვას, ბორჯომის მუნიციპალიტეტის გამგებლის დიმიტრი ყიფიანის თქმით, იქიდან გამომდინარე, რომ ცეცხლი რთულად მისადგომ ადგილზეა, შესაძლოა სამუშაოებში ვერტმფრენიც ჩაერთოს, თუმცა, ამას თავად მეხანძრე-მაშველები საჭიროებიდან გამომდინარე გადაწყვეტენ.
ხანძარია ლისის ტბის მიმდებარე ტერიტორიაზეც, ცეცხლი დაახლოებით 1000 კვადრატულ მეტრზე ბალახის საფარს იყო მოდებული, მაგრამ ადგილზე მობილიზებულმა სახანძრო-სამაშველო ჯგუფებმა უკვე მოახერხეს ცეცხლის ლოკალიზება და მისი საბოლოო ლიკვიდაციაც მალევე მოხდება.
