ფოთში, სავაჭრო ცენტრში გაჩენილი ხანძრის შედეგად დაზარალებული მოვაჭრეები პროკურატურასთან შეიკრიბნენ.
ისინი სამართალდამცავ ორგანოებს გამოძიების დაჩქარებისკენ მოუწოდებენ, ადგილობრივ ხელისუფლებასა და ბაზრის ადმინისტრაციას კი, ერთჯერად ფინანსურ დახმარებას სთხოვენ, რათა თავინთი საქმიანობა განაახლონ.
დაზარალებულების განცხადებით, მათ კონკრეტული პასუხი ამ დრომდე არ მიუღიათ.
„ხანძრის გაჩენიდან ერთი თვე შესრულდა და ამ დრომდე არანაირი გეგმა არ აქვს არც ხელისუფლებას, არც ბაზრის ადმინისტრაციას. ვითხოვთ გამოძიების დაჩქარებას. გვაინტერესებს გამოძიება რა ეტაპზეა. სხვა საკითხებში არასამთავრობო ორგანიზაციების იმედი გვაქვს. პროკურორი შეგვპირდა, რომ სამართლიანი გამოძიება ჩატარდება. '' აცხადებენ ისინი.
ფოთის ბაზრობაზე ხანძარი 10 ივლისს გაჩნდა. ხანძრის გამომწვევი მიზეზების დასადგენად გამოძიება მიმდინარეობს.