პარიზის გარეუბანში, ლევალუა-პერეში სამხედროების ჯგუფზე ავტომობილის დაჯახების შედეგად ექვსი სამხედრო დაშავდა. აღნიშნულის შესახებ ფრანგული გამოცემა Le Figaro იუწყება.
სამხედროების ჯგუფი, რომელსაც ავტომობილი დააჯახეს, მონაწილეობს ოპერაცია Sentinelle-ში, რომლის დანიშნულებაა მოქალაქეთა უსაფრთხოების უზრუნველყოფა საჯარო ადგილებში.
თავდამსხმელი ( თუ თავდამსხმელები) დაჯახების შემდეგ ამ ავტომობილითვე მიიმალა ინციდენტის ადგილიდან. დაშავებულია 6 სამხედრო, მათგან ორის მდგომარეობა მძიმეა, თუმცა მათ სიცოცხლეს საფრთხე არ ემუქრება.
ფრანგ სამართალდამცველებს აღნიშნული ინციდენტისთვის კვალიფიკაცია ჯერ არ მიუციათ, თუმცა, როგორც პოლიციაში აღნიშნეს, საქმე ეხება „აპრიორი განზრახ ჩადენილ ქმედებას“.
ამჟამად, პოლიცია ავტომობილის ძებნის ოპერაციას ატარებს.
