სამოქალაქო მისიის ,,არა ოკუპაციას!'' ერთერთი ორგანიზატორი, ჟურნალისტი ლაშა ბერულავა სოციალურ ქსელში ტელერადიოკომპანია ,,ოდიშის'' მხარდაჭერას ეხმაურება .
,,1994 წლის მარტში, გალის რაიონში ეთნიკური წმენდის დროს, როცა რუსი „მშვიდობისმყოფელების" წაყრუებით ბოევიკებმა ბევრი მშვიდობიანი მოქალაქე მოკლეს, გალის რაიონში კამერით გადავიპარე.
მშვიდობით დავბრუნდი და საშინელი კადრები გადავიღე: ჩავწერე სკალპახდილი ქართველი, ნაწამები ცხედრები, წამების ადგილზე სისხლის კვალი… მაშინ „ოდიშში" ვმუშაობდი და მახსოვს, სანამ ორსანტიიდან ოტობაიაში გადავიდოდით, მასპინძელს „ოდიში" ჰქონდა ჩართული, როცა ოთახში მარტო დავიგულე თავი, რაღაცნაირად, გული ამიჩუყდა, ტელევიზორთან ჩავიმუხლე და „ოდიშის" ლოგოს ვაკოცე: 22 წლისაც არ ვიყავი…
დღეს ჩემი მშობლიური „ოდიში" აი, ასე ხვდება „ქრონიკა პლუსის" ინიციატივას, ენგურის ხიდზე ცოცხალი ჯაჭვის გავლების შესახებ…
გუნდი ჩვენს აქციას უერთდება.- წერს ლაშა ბერულავა თავის ფეისბუქგვერდზე.
