,, პატრიოტთა ალიანსი'' და „ დემოკრატიული მოძრაობა“ არ არიან მიწვეული მაიკ პენსის შეხვედრებზე საპარლამენტო და არასაპარლამენტო ოპოზიციასთან , რომელიც ხვალ "თბილისი მარიოტშია "დაგეგმილი
საპარლამენტო ოპოზიციიდან „ნაციონალური მოძრაობა“ რეგიონში არსებულ გამოწვევებზე და ქვეყნის შიგნით არაფორმალური მმართველობის პრობლემებზე ისაუბრებს. პარტია პოსტ-საბჭოთა სივრცეში ოლიგარქიული მმართველობის პრობლემებსა და საქართველოს მესამე პრეზიდენტისთვის მოქალაქეობის ჩამორთმევის საკითხსაც დააყენებს.
„ევროპული საქართველოდან“ მაიკ პენსთან შეხვედრას დავით ბაქრაძე დაესწრება. პარტიაში აცხადებენ, რომ განხილვის თემები არაფორმალური მმართველობა და მედია თავისუფლების საკითხები, მათ შორის „რუსთავი 2“-ის საქმე იქნება.
პარლამენტის ყოფილი თავმჯდომარე, დავით უსუფაშვილი აცხადებს, რომ აშშ-ის ვიცე-პრეზიდენტს ქვეყნის შიგნით არსებულ პრობლემებს გააცნობს და სახელმწიფო ინსტიტუტების გაძლიერებაში დახმარებას სთხოვს.
თავისუფალი დემოკრატების ერთ-ერთი ლიდერი, შალვა შავგულიძე კი გეგმავს დონალდ ტრამპის ადმინისტრაციის წარმომადგენელს საკონსტიტუციო ცვლილებების პროცესის, სახელმწიფო ინსტიტუტების მოშლისა და არაფორმალური მმართველობის პრობლემებზე ესაუბროს.
რაც შეეხება პარტიებს, რომელნიც შეხვედრაზე არ მიიწვიეს, „პატრიოტთა ალიანსი“, ამის თაობაზე პარტიაში კომენტარს არ აკეთებს. ხოლო , ნინო ბურჯანაძე კი აცხადებს, რომ მას ეს არც გაკვირვებია.
მე კარგად ვიცნობ ამერიკის დემოკრატიის ხარისხს – უკვე ტრადიციად იქცა ნინო ბურჯანაძე არ მიიწვიონ ისეთ შეხვედრებზე, სადაც შეიძლება დისკომფორტი შეექმნას ჩვენს ხელისუფლებას – განაცხადა „დემოკრატიული მოძრაობის“ ლიდერმა. – პენსი ხვდება იმ პოლიტიკურ ჯგუფებს, ვისგანაც იმას მოისმენს, რისი მოსმენაც სურთ. არ გვხდებიან ჩვენ, ვისაც განსხვავებული მოსაზრება გვაქვს. უდავოდ მნიშვნელოვანია ამერიკის ვიცე პრეზიდენტის ვიზიტი საქართველოში, მაგრამ ხაზგასმით აღვნიშნავ, რომ მნიშვნელოვანია უფრო ამერიკისთვის, ვიდრე საქართველოსთვის“ – განაცხადა ნინო ბურჯანაძემ