10 ადამიანი დაშავდა სტამბოლში ძლიერი შტორმის შედეგად.
გადაუღებელმა წვიმებმა და ძლიერმა სეტყვამ ქალაქში მცირე ნგრევაც გამოიწვია. შეფერხებულია აეროპორტების მუშაობა. დატბორილია მეტროსადგურები. რამდენიმე რაიონში დაიტბორა საცხოვრებელი სახლების პირველი სართულებიც. შეზღუდულია საავტომობილო მიმოსვლა, ბევრი იძულებული გახდა ქუჩაში, წყალში დაეტოვებინა მანქანა.
ადგილობრივი ხელისუფლების ინფორმაციით, რამდენიმე საათით შეჩერდა ბოსფორის გვირაბის ფუნქციონირება.
ადგილობრივი მედიის ინფორმაციით, ძლიერმა ქარმა ძირფესვიანად მოგლიჯა ხეები, ერთ-ერთ პორტში კი წააქცია ამწე, რომელიც ნავთობის ავზს დაეცა, რამაც აფეთქება გამოიწვია.
სეტყვა კი იმდენად ძლიერი იყო, რომ თვითმფრინავის პილოტის ფანჯარაც კი ჩაამსხრია, რის შემდეგაც, მფრინავმა ავარიული დაშვება განახორციელა.
ძლიერმა წვიმამ ქალაქში დატბორა ქუჩები და სარდაფები. ქალაქის ერთ-ერთ რაიონში მეჩეთი ჩამოინგრა. სტიქიის შედეგად, 10 ადამიანი დაშავდა, მათგან 2 მძიმე მდგომარეობაშია.
შტორმმა სულ რაღაც სააათნახევარში ქალაქს მძიმე კვალი დაატყო.
ეს სტამბოლში ბოლო 10 დღის განმავლობაში, უკვე მეორე ძლიერი შტორმია.
.