საქართველოს პრეზიდენტი შიდა ქართლში, საოკუპაციო ზოლთან საზოგადოებრივ აქტივისტთა ჯგუფის ჩასვლის ფაქტს და სამოქალაქო პატრულირებას ეხმაურება. განცხადება გიორგი მარგველაშვილის პრესსპიკერმა გააკეთა.
პრეზიდენტი მიიჩნევს, რომ საოკუპაციო ზოლთან მდგარი ადამიანები საკუთარი ქმედებით ქართველი ხალხის სიმტკიცეს და ოკუპაციის მიმართ შეურიგებლობას გამოხატავენ. თუმცა, გიორგი მარგველაშვილი სამოქალაქო აქტივისტებს რუსულ პროვოკაციებს ახსენებს და სიფრთხილისკენ მოუწოდებს.
„პრეზიდენტის აზრით, დღეს საოკუპაციო ზოლთან მდგარი ადამიანები საკუთარი ქმედებით ქართველი ხალხის სიმტკიცეს და ოკუპაციის მიმართ შეურიგებლობას გამოხატავენ. ეს სულისკვეთება საბოლოოდ ჩვენს ქვეყანას აუცილებლად მიიყვანს გამარჯვებამდე. ამასთანავე, პრეზიდენტი სამოქალაქო აქტივისტებს სიფრთხილისკენ მოუწოდებს. არ უნდა დაგვავიწყდეს, რომ მავთულხლართების მეორე მხარეს დგას ის ძალა, რომელიც მუდმივად ეძებს და აწყობს პროვოკაციებს,” – განაცხადა ეკა მიშველაძემ.
შეგახსენებთ, რომ საზოგადოებრივ აქტივისტთა ჯგუფი შიდა ქართლში, საოკუპაციო ხაზზე დაკვირვებას იწყებს. სამოქალაქო პატრულირების მიზანია, ე.წ. სასაზღვრო ზოლზე ოკუპანტების აქტივობის დაკვირვება და საჭიროების შემთხვევაში, საზოგადოების დროული ინფორმირება.
აქტივისტთა ჯგუფი დაკვირვებას უსაფრთხო ზონიდან, დურბინდის საშუალებით განახორციელებს.