წალენჯიხის მუნიციპალიტეტში, გამგეობის ადმინისტრაციის წინ დღეს საპროტესტო აქცია გაიმართა. შეკრებილებმა გიორგი მიქავას ხონში, ნანეიშვილის სახელობის ფსიქიკური ჯანმრთელობის ეროვნულ ცენტრში იძულებით მოთავსება გააპროტესტეს. მათი განცხადებით, ის უდანაშაულოა, რადგან, როგორც თავად აცხადებენ, გამგეობის კუთვნილი ის თუნუქის ფილები, რომელიც გიორგის სახლში მიჰქონდა, არ მოუპარავს და მას ის აჩუქეს. მიქავას ოჯახის წევრები აცხადებენ, სასამართლოს შემდეგ გადაწყდა, რომ ის ფსიქიატრიულ კლინიკაში მოეთავსებინათ და ემკურნალათ.
წალენჯიხის გამგეობის წინ შეკრებილ ოჯახის წევრებს და ნათესავებს რაიონის მაჟორიტარი დეპუტატი შეხვდა. გოგა გულორდავას განცხადებით, გიორგი მიქავა საზოგადოებისთვის საშიში არ არის.
ექსპერტიზის მიერ გაცემულ დასკვნაში წერია, რომ გიორგი მიქავა სოციალურ საშიშროებას წარმოადგენს და ის იძულებით მკურნალობას საჭიროებს, თუმცა მისი ოჯახი და მეგობრები საპირისპიროს ამტკიცებენ. მიქავას ახლობლები ასევე აცხადებენ, რომ მის გასათავისუფლებლად ხელმოწერების შეგროვება უკვე დაიწყეს.