თბილისის საქალაქო სასამართლომ, თბილისის მერიის მაღალჩინოსანს ოთარ აბესაძეს აღკვეთის ღონისძიების სახით წინასწარი პატიმრობა შეუფარდა. გადაწყვეტილება მოსამართლემ რამდენიმე წუთის წინ გამოაცხადა.
საქმის მოსამართლემ ბრალდების მხარის მოთხოვნა დააკმაყოფილა. პროკურორმა დღევანდელ სხდომაზე განაცხადა, რომ არსებობს მოწმეებზე ზემოქმედების საფრთხე.
დაცვის მხარე აღკვეთის ღონისძიების სახით 15 ათასი ლარის ოდენობის გირაოს ითხოვდა.
პროცესზე ბრალდებულმა სიტყვით მიმართა მოსამართლეს და განაცხადა, რომ მზად არის გამოძიებასთან თანამშრომლობისთვის, რათა საქმე გავიდეს "ფინიშში".
"მინდა ოჯახს მეგობრებს და საზოგადოებას სინანულით მოვუხადო ბოდიში. არ წარმოვადგენ მე იმ საშიშროებას, საფრთხეს, რომ საქმის მსვლელობას შევუშალო ხელი. მქონდა პროგრესული თანამდებობები, ვკითხულობ ლექციებს, არავინ მომცემს იმის უფლებას, რომ მივიმალო. არ წარმოვადგენ იმ ადამიანს, ვინც შეიძლება ზიანი მიაყენოს ამ საქმეს. სინანულით ვსაუბრობ და მზად ვარ ვითანამშრომლო. დუმილის უფლებასაც ვინარჩუნებ იქამდე, სანამ საქმის განხილვა დაიწყება. აუცილებლად ჩავერთვები საქმეში. არ ვარ ცუდი ადამიანი," განაცხადა აბესაძემ მოსამართლის მიერ გადაწყვეტილების გამოცხადებამდე.
სახელმწიფო უსაფრთხოების სამსახურმა ოთარ აბესაძე ქრთამის აღების ბრალდებით ორი დღის წინ დააკავა.
.