ანაკლიის ღრმაწყლოვანი ნავსადგურის მშენებლობის მიზნით მიმდებარე ტერიტორიაზე 4 ოჯახს უძრავი ქონება ჩამოერთმევა. საუბარია, დაახლოებით 15 238 კვადრატული მეტრის ფართზე. ეს მიწები დაექვემდებარება ექსპროპრიაციას ( საკუთრების ძალადობრივ ჩამორთმევას სახელმწიფოს მიერ ანაზღაურებით ან მის გარეშე) . – ასეთი გადაწყვეტილება მიიღო ეკონომიკისა და მდგრადი განვითარების სამინისტრომ მიმდინარე წლის 10 ივლისს.
როგორც ეკონომიკის მინისტრის მოადგილის ირმა ქავთარაძის 2017 წლის 10 ივლისის ბრძანებაშია აღნიშნული, ამ მიწების მესაკუთრეებმა უარი განაცხადეს უძრავი ქონების ნებაყოფლობით გამოსყიდვაზე იმ მიზეზით, რომ მათთვის მიუღებელია ქონების გამოსასყიდი ღირებულების ის ოდენობა, რომელიც სამინისტრომ შესთავაზა, თუმცა ინფორმირებულნი იყვნენ, რომ გამოსყიდვაზე მათი უარის შემთხვევაში სსიპ ,,სახელმწიფო ქონების ეროვნული სააგენტო“ მათი საკუთრების ექსპროპრიაციას მოახდენს.
აქვე აღნიშნულია, რომ ექსპროპრიაციის შემთხვევაში საექსპროპრიაციო ქონების სანაცვლოდ მესაკუთრეები კონსტიტუციით გარანტირებულ წინასწარ, სრულ და სამართლიან ანაზღაურებას მიიღებდნენ.
აღსანიშნავია, რომ ეს ექსპროპრიაციის 1-ლი შემთხვევა არ არის. წინა თვეში სამინისტრომ კიდევ 9 ოჯახის უძრავი ქონების, დაახლოებით, 14,700 კვადრატული მეტრის ფართის ჩამორთმევის შესახებ მიიღო გადაწყვეტილება.
საქართველოს მთავრობასა და შპს „ანაკლიის განვითარების კონსორციუმს“ შორის 2016 წლის 3 სექტემბერს გაფორმდა ანაკლიის ღრმაწყლოვანი პორტის მშენებლობის, ოპერირებისა და გადაცემის შესახებ საინვესტიციო ხელშეკრულება, რომლითაც განისაზღვრა სახელმწიფოს ვალდებულება – ინვესტორს ანაკლიის ღრმაწყლოვანი ნავსადგურის მშენებლობის მიზნით გადასცეს 340 ჰექტარი მიწის ნაკვეთი.
წყარო:https://bpn.ge/finansebi/