ერაყის შეიარაღებულმა ძალებმა ქალაქ მოსულზე კონტროლი დაამყარეს. განცხადებას ერაყის პრემიერმინისტრის პრესსამსახური ავრცელებს.
ისლამისტი მებრძოლებისგან მოსულის გათავისუფლების შემდეგ ქალაქში ერაყის პრემიერ-მინისტრი ჰაიდერ ალ აბადი ჩავიდა, რომელმაც სამხედროებს გამარჯვება პირადად მიულოცა.
პრემიერმა აქვე ქალაქში დარჩენილი ტერორისტების ლიკვიდაციის და ქუჩების განაღმვის ბრძანება გასცა.
მოსულის დაკარგვა დიდი დანაკლისია დაჯგუფება ისლამური სახელმწიფოსთვის და სამხედრო ექსპერტების შეფასებით ეს გადამწყვეტი მნიშვნელობისა შეიძლება აღმოჩნდეს მოვლენათა შემდგომ განვითარებაში.
მოსულში „ისლამური სახელმწიფოს“ ტერორისტების განადგურება ერაყელი ხალხის უდიდესი გამარჯვებაა. – ნათქვამია სირიის საგარეო საქმეთა სამინისტროს მიერ გავრცელებულ განცხადებაში.
„სირია ერაყის მთავრობას, მის არმიასა და ხალხს ამ წარმატებას ულოცავს და ხაზგასმით აღნიშნავს ორი ძმური სახელმწიფოს შეიარაღებული ძალების თანამშრომლობის მნიშვნელობას „ისლამური სახელმწიფოს“ განადგურებისთვის“, – ნათქვამია სირიის საგარეო უწყების განცხადებაში.
ერაყის სიდიდით მეორე ქალაქი ისლამისტებმა 2014 წელს დაიკავეს. ინტენსიური ბრძოლა მის გასათავისუფლებლად ბოლო 10 თვის განმავლობაში მიმდინარეობდა.