სად იყო დავით ნარმანია, როცა ელიავას ბაზრობაზე ხანძარი მძვინვარებდა? – ეს კითხვა არაერთხელ დაისვა წუხელაც, როცა საქართველოს მოსახლეობა სატელევიზიო პირდაპირ ეთერში ადევნებდა თვალს მოვლენების განვითარებას, და დღესაც, როცა ხანძარი ჩაქრობილია დადგება მომხდარის განსჯის დრო. ეთერში ჩანდა ვიცე-მერი, მაგრამ თავად მერი არგამოჩენილა, მას არც რაიმე კომენტარი გაუკეთებია.
დღეს დავით ნარმანიამ პასუხი გასცა ამ კითხვას. მისი თქმით, მერის მოადგილეები და გამგებელი იმყოფებოდნენ ადგილზე, ხოლო ის გარკვეული საკითხების კოორდინაციას შტაბიდან ახორციელებდა: ,,არ ვიმყოფებოდი ადგილზე, ვინაიდან ადგილზე გარკვეული ქაოტური ვითარება იყო და ადგილიდან პროცესების მართვა შეუძლებელი იქნებოდა.'' – განაცხადა მან.
დედაქალაქის მერი აცხადებს, რომ ახლა, სანამ დადგენილი არ არის ელიავას ბაზრობაზე გაჩენილი ხანძრის მიზეზები, ვინმეზე პასუხისმგებლობის დაკისრებაზე საუბარი არ შეიძლება იყოს.
„რაც შეეხება პასუხისმგებლობის საკითხს, იდეალური სიტუაციაა რასაკვირველია, როცა ბიზნესი დაზღვეულია, თუმცა, როგორც ირკვევა ამ შემთხვევაშიც არ არის დაზღვეული ამ ბიზნესის ძირითადი ნაწილი. ცალსახად თქმა ახლა იმისა, რომ აუცილებლად ადმინისტრაციამ უნდა აგოს პასუხი თუ არა, იმის შემდეგ იქნება შესაძლებელი, რაც გამოძიების შედეგები დაიდება. პირველ რიგში უნდა დადგინდეს ხანძრის გამომწვევი მიზეზები“, – განაცხადა მან.