ხვალ, 3 ივლისს ერთიანი ეროვნული გამოცდები იწყება. 2017 წლის ერთიანი ეროვნული გამოცდებისთვის საგამოცდო ცენტრები გახსნილია საქართველოს ყველა ქალაქში, გარდა ოკუპირებული ტერიტორიებისა. თბილისში ათი საგამოცდო ცენტრია გახსნილი, ქუთაისში – სამი, ხოლო ზუგდიდსა და დანარჩენ ქალაქებში თითო საგამოცდო ცენტრი იფუნქციონირებს.
გამოცდები დაწყების წინ შეფასებისა და გამოცდების ეროვნული ცენტრის ხელმძღვანელი მაია მიმინოშვილი რაიმე გაუგებრობის თავიდან ასაცილებლად აბიტურიენტებს რჩევას აძლევს, გამომდინარე იქიდან, რომ წინა წლებში იყო აბიტურიენტების მიერ საგამოცდო ადგილის არევისა და დაგვიანების შემთხვევები.
იგი მოუწოდებს აბიტურიენტებს, დროულად გამოცხადდნენ საგამოცდო ბარათზე მითითებულ მისამართებზე და გაიარონ რეგისტრაცია. მისი თქმით, მნიშვნელოვანია აბიტურიენტებმა ყურადღებით წაიკითხონ საგამოცდო ბარათი, სადაც მითითებულია როგორც საგამოცდო ადგილი, ასევე დრო.
”ჩემი უმორჩილესი თხოვნაა, რამდენჯერმე წაიკითხონ საგამოცდო ბარათი დაკვირვებით. საგამოცდო ბარათზე მითითებულია საგამოცდო ცენტრი, დააკვირდნენ ცენტრის მისამართს და, რაც მთავარია, დროულად გამოცხადდნენ რეგისტრაციაზე”, – აღნიშნა მაია მიმინოშვილმა.