ელიავას ბაზრობის მიმდებარე ტერიტორიაზე ხანძარია.
ცეცხლი ხოშარაულის ქუჩაზე ავტონაწილების ბაზრობაზე საღებავებისა და ქიმიური ნივთიერებების საწყობს გაუჩნდა და სხვა საწყობებზე გავრცელდა.
როგორც საგანგებო სიტუაციების სააგენტოში აცხადებენ, ადგილზე 17 სახანძრო-სამაშველო ჯგუფია მობილიზებული., მაგრამ ცეცხლის ჩაქრობა ჯერჯერობით ვერ ხერხდება.
თვითმხილველების თქმით, მათ თავდაპირველად მცირე ბოლი შენიშნეს, მაგრამ სანამ მის წარმომავლობას გაარკვევდნენ, ცეცხლი საკმაოდ ვრცელ ტერიტორიას მოედო. ისმოდა აფეთქებების ხმა, როგორც ჩანს ზეტიღა და სხვა აალებადი ნივთიერებებით სავსე ავზები სკდებოდა.
მეხანძრეები თავს იკავებენ კომენტარებისაგან.
ირგვლივ ძლიერი შავი კვამლია, რაც გამოწვეულია იმით, რომ ცეცხლი მოედო გასაყიდ საბურავებს და რეზინის სხვა ნაწარმს. ცუდი ხილვადობისა და ძლიერი ცეცხლის მიუხედავად, მეხანძრეები სავარაუდო მთავარ კერას უახლოვდებიან.
ხანძრის ადგილზე უამრავი ხალხია შეკრებილი, ძირითადად მოვაჭრეები, რომელნიც სტრესულ მდგომარეობაში იმყოფებიან, რადგან ამ ხანძრის გამო პირისპირ რჩებიან ბანკის ვალების წინაშე და კარგავენ ოჯახის რჩენის ერთადერთ წყაროს.