დღეს წალენჯიხის რაიონის სოფელ ჭალეს მოსახლეობამ კიდევ ერთხელ გააპროტესტა მაღალი ძაბვის გადამცემი ხაზისა და ანძების მშენებლობა მათი სახლებისა და საკარმიდამო ნაკვეთების სიახლოვეს
მოსახლეობამ კომპანია „ენერგოტრანსის“ ტექნიკას მუშაობის საშუალება არ მისცა. ადგილზე სამართალდამცველებსა და ადგილობრივებს შორის დაპირისპირება მოხდა.
”არც ერთ მოსახლეს ჩვენს უბანში კომპენსაცია არ მიუღია. ჩვენ ვითხოვთ ეს ელექტროგადამცემი ხაზები ჩვენი საკარმიდამო ნაკვეთებიდან და სახლებიდან მინიმუმ 350 მეტრის მოშორებით გაიყვანონ, ან დაგვაკმაყოფილონ შესაბამისი კომპენსაციით“, – განაცხადა ადგილობრივმა მცვხოვრებმა მანანა აქუბარდიამ.
საპატრულო პოლიციის წარმომადგენლებმა მოსახლეობა სამშენებლო ტერიტორიიდან გაიყვანეს. ამ დროისთვის ადგილზე ხაზებისა და ანძების მშენებლობის სამუშაოები გრძელდება.
აქციის მონაწილეებს წალენჯიხის გამგებლის მოადგილე კახა შეროზია შეხვდა. შეროზია ჟურნალისტებთან საუბრისას აცხადებს, რომ მოსახლეობის ნაწილი კომპენსაციით უკვე დაკმაყოფილდა და დანარჩენი ნაწილიც დაკმაყოფილდება.