ბათუმში, სასტუმრო „შერატონში“ ვენეციის კომისიის პრეზიდენტის ჯანი ბუკიკიოს ოფიციალურ შეხვედრები იწყება. პირველი შეხვედრა პარლამენტის თავმჯდომარესთან იმართება. მას პრემიერ მინისტრი გიორგი კვირიკაშვილი, საგარეო საქმეთა მინისტრი მიხეილ ჯანელიძე და საპარლამენტო უმრავლესობის ლიდერი არჩილ თალაკვაძეც ესწრებიან.
როგორც შეხვედრის დაწყებამდე ვენეციის კომისიის პრეზიდენტმა განაცხადა , იგი კიდევ ერთხელ დააფიქსირებს საკუთარ უარყოფით დამოკიდებულებას პროპორციული სისტემით არჩევნების ჩატარების 2024 წელს გადავადებასთან დაკავშირებით.
საქართველოს პარლამენტის თავმჯდომარე ირაკლი კობახიძე კი აცხადებს, რომ მზად არის ამ შეხვედრაზე გააკეთოს ახსნა განმარტებები თუ რატომ გადავადდა პროპორციულ სისტემაზე გადასვლა 4 წლით.
„შეგვიძლია ძალიან მკაფიოდ ავუხსნათ ჯანი ბუკიკიოს ის, თუ რა გახდა ამ გადაწყვეტილებების მიზეზი. ამ გადაწყვეტილებებს ჰქონდა თავისი მიზეზი, ამაზე გვექნება დღეს საუბარი და დარწმუნებული ვართ, რომ ბატონი ჯანი ბუკიკიოსგან იქნება ბუნებრივია, შესაბამისი პასუხი. როგორც მოგეხსენებათ, მესამე მოსმენის განხილვის პროცესში შესაძლებელია მხოლოდ სარედაქციო ცვლილებების შეტანა დოკუმენტში, აქედან გამომდინარე არსებითი ცვლილებები დოკუმენტში ვეღარ შევა,“ – აცხადებს ირაკლი კობახიძე.