ბათუმის მოვლენების საქმეზე დაკავებულ ირაკლი ჩხვირკვიას დღეს სახალხო დამცველის წარმომადგენელი მოინახულებს. ადვოკატის თქმით, მისი დაცვის ქვეშ მყოფი თავს პოლიტპატიმრად მიიჩნევს და პროტესტის ნიშნად, 6 დღეა შიმშილობს. ბრალდებული ციხეში შექმნილ პირობებსაც აპროტესტებს და ქუთაისიდან თბილისში ე.წ. მატროსოვის ციხეში გადაყვანას ითხოვს.
"ეს ადამიანი 5-ის ნახევარზე ჩავიდა ბათუმში და მანამდე არანაირი ზარი არავისთან განხორციელებული არ აქვს, შესაბამისად, ვერაფრის ორგანიზატორი ეს ადამიანი ვერ იქნებოდა. გარდა ამისა, მისი პირობები ქუთაისის ციხეში არის არადამაკმაყოფილებელი და დარწმუნებული ვარ, პირადი შეხვედრის შემდეგ სახალხო დამცველს უფრო დეტალურად მოახსენებს, რა ზეწოლა ხორციელდება მასზე," – აცხადებს ადვოკატი, გიორგი ონიანი.
სასჯელაღსრულების სამინისტროში კი აცხადებენ, რომ პატიმარი მისივე მოთხოვნით რამდენიმე დღეა სამარტოო საკანში გადაიყვანეს, სადაც 24 საათიანი ვიდეო მეთვალყურეობაა. უწყების ინფორმაციითვე, ბრალდებულმა გუშინ საკვებიც აიღო.