დეკანოზ გიორგი მამალაძის ოჯახის წევრები ილია მეორეს ადვოკატების გარეშე შეხვდებიან. როგორც დეკანოზის ძმა აცხადებს, ისინი პატრიარქს მიაწვდიან იმ ინფორმაციას, რომელიც მისივე შეფასებით, დეკანოზის უდანაშაულობას ამტკიცებს და რომელსაც პროკურატურა უწმინდესს არ აწვდის. თორნიკე მამალაძე ასევე საპატრიარქოს შიგნით არსებულ კონკრეტულ ძალებზე საუბრობს, რომლებიც ცდილობენ პატრიარქს სწორი ინფორმაცია დაუმალონ.
დეკანოზის ძმა განმარტავს, რომ თუ პატრიარქთან შეხვედრა მხოლოდ დალოცვის ფორმატით წარიმართება, ისინი შეეცდებიან რომ ილია მეორესთან ინფორმაციული აუდიენცია გამართონ. გიორგი მამალაძის ოჯახის წევრებს სჯერათ, რომ უწმინდესი მამა გიორგის მიმართ ნდობას არ კარგავს.
დეკანოზის ძმისვე თქმით, საპატრიარქოდან მათ უკვე დაუკავშირდნენ და შეხვედრისთვის უკვე ყველაფერი მზადაა.
დეკანოზს საქმის განხილვა თბილისის საქალაქო სასამართლოში 23 ივნისს განახლდება.
დეკანოზი გიორგი (მამალაძე) მკვლელობის მომზადების ბრალდებით თბილისის საერთაშორისო აეროპორტში 10 თებერვალს დააკავეს. ის ბერლინში პატრიარქთან მიფრინავდა. ილია მეორეს HELIOS Klinikum Berlin-Buch-ში ოპერაციისთვის ამზადებდნენ. ჟურნალისტმა ირაკლი მამალაძემ პროკურატურას აცნობა, რომ მამა გიორგიმ ციანიდის მოძიებაში დახმარება სთხოვა, რითაც მაღალი იერარქიის სასულიერო პირი უნდა მოეწამლა.