სამაუწყებლო კომპანია რუსთავი 2-ის საინფორმაციო სამსახურის ყოფილი ხელმძღვანელი გიორგი ლაფერაშვილი შესაძლოა სამუშაოდ კონკურენტ არხზე – ტელეკომპანია „იმედზე“ გადავიდეს. აღნიშნულთან დაკავშირებით ინფორმაცია ქართულ ონლაინ მედიაში გუშინ გავრცელდა. გამოცემების თანახმად, რუსთავი 2-ის მენეჯმენტმა მას საინფორმაციო სამსახურის უფროსის პოსტიდან გათავისუფლების შემდეგ არხის პოლიტიკური მიმართულების პროდიუსერობა შესთავაზეს, თუმცა მან შეთავაზებაზე უარი განაცხადა. გარვცელებული ინფორმაციით, ლაფერაშვილი „იმედზე“ საქმიანობას სულ მალე გააგრძელებს.
თავად გიორგი ლაფერაშვილი აღნიშნულს არც ადასტურებს და არც უარყოფს. ონლაინგამოცემა ამბები.გე-ს ინფორმაციით, მან ამ თემაზე საუბრისგან თავი შეიკავა.
ამ დრომდე კომენტარი არ კეთდება ტელეკომპანია იმედში. არხის პროგრამების დირექტორს მაია ჩუგოშვილს ლაფერაშვილის შესაძლო გადმოსვლაზე ინფორმაცია არ აქვს.
ინფორმაცია იმის შსახებ, რომ გიორგი ლაფერაშვილი რუსთავი 2-დან იმედში აპირებს გადმოსვლას რამდენიმე კვირის წინათაც გავრცელდა. მას შემდეგ, რაც მისი თანამდებობა სამაუწყებლო კომპანიაში ნოდარ მელაძემ ჩაიბარა, ლაფერაშვილმა არხის რამდენიმე ჟურნალისტთან ერთად წასვლის გადაწყვეტილება მიიღო. ერთ-ერთი ჟურნალისტი ნატა მახვილაძეა, რომელმაც მუშაობა უკვე იმედში დაიწყო და არხის მთავარი საინფორმაციო გამოშვების ქრონიკის პოლიტიკური ბლოკის რეპორტიორია.
შეგახსენებთ, რომ გიორგი ლაფერაშვილი წლების განმავლობაში ტელეკომპანია იმედში რეპორტიორად მუშაობდა.