ვაშინგტონის პოლიცია თურქეთის პრეზიდენტის რეჯეფ თაიფ ერდოღანის დაცვის 12 წევრს ბრალდებას წაუყენებს, – იუწყება სააგენტო „ასოშეიტედ პრესი“ წყაროზე დაყრდნობით. 

 

სააგენტოს ინფორმაციით, ვაშინგტონის მერი და პოლიციის ხელმძღვანელი შესაბამის განცხადებას პრესკონფერენციაზე გააკეთებენ. კერძოდ, ერდოღანის დაცვის 7 წევრს ბრალდებას სისხლის სამართლის დანაშაულში, ხოლო 5 წევრს კი ნაკლებად მძიმე დანაშაულში წაუყენებენ. იმის გათვალისწინებით, რომ ერდოღანის დაცვის წევრები თურქეთში დაბრუნდნენ, აშშ-ის ტერიტორიაზე შესვლისას მათ დაკავება ემუქრებათ. 

 

საქმე ეხება თურქეთის პრეზიდენტის რეჯეფ თაიფ ერდოღანის ვიზიტს ვაშინგტონში, რომლის დროსაც, 16 მაისს  მისი დაცვის წევრებსა და ერდოღანის მოწინააღმდეგე მანიფესტანტებს შორის ჩხუბი მოხდა. 

 

 ჩხუბის დროს ვაშინგტონის პოლიციამ თურქეთის პრეზიდენტის დაცვის სამსახურის ორი წევრი დააკავა, თუმცა შემდეგ გაათავისუფლა. 

 

ჩხუბის შედეგად 9 ადამიანი დაშავდა. თურქეთის საელჩოს განცხადებით, ჩხუბის პროვოცირება „ქურთისტანის მუშათა პარტიის“ მხარდამჭერებმა მოახდინეს.