თბილისში , საკუთარი სახლის მიმდებარე ტერიტორიიდან გატაცებული ბიზნესმენი გივი ჯიბლაძე, რომელიც სამშენებლო კომპანია ,,სვეტის'' ხელმძღვანელია, ვარაუდობს, რომ მასზე თავდასხმა ფულის გამოძალვის მიზნით დაკავშირებულია ,,სვეტსა'' და ცნობილი მოქანდაკის ზურაბ წერეთლის კომპანიის წარმომადგენლებს შორის არსებულ დაპირისპირებასთან . მისი ინფორმაციით, რამდენიმე დღის წინ მის კაბინეტში ამასთან დაკავშირებით სროლაც იყო.
ჩვენ ვაკეთებთ ბაკურიანში ერთერთ პროექტს, ეს მიწა იყო ცნობილი მოქანდაკისა და მხატვრის ზურაბ წერეთლის, მისი წარმომადგენლის ახლობლები არიან. ჩვენ პირობებით უნდა მიგვეცა აშენებულ ფართში კონკრეტული ქონებები, მაგრამ ბოლო მომენტში გადაწყდა ისე, რომ ამ პიროვნებამ მოითხოვა თანხა 150 ათასი, ჩვენ ჩავწერეთ კონტრაქტში, რომ ეს უნდა მიგვეცა მშენებლობის ნებართვიდან სამი თვის ვადაში. მშენებლობის ნებართვა ფიზიკურად ვერ გაკეთდა ჯერჯერობით. მერე იყო შემოთვლები, ჩარიეს ყველა, პრაქტიკულად ამათ უნდოდათ იმ ორგანიზაციდან ამ ფულის მითვისება, მიწა არის ზურაბ წერეთლის საკუთრება“,-განაცხადა ჯიბლაძემ.
ბიზნესმენი ვარაუდობს, რომ თავად ზურაბ წერეთელი არ იყო ამ ფაქტთან დაკავშირებით ინფორმირებული. "დაკავებული, მისი წარმომადგენლის ახლობელია"- აცხადებს ჯიბლაძე.
შეგახსენებთ, შინაგან საქმეთა სამინისტროს ცენტრალური კრიმინალური პოლიციის დეპარტამენტის ორგანიზებულ დანაშაულთან ბრძოლის მთავარი სამმართველოს თანამშრომლებმა, სასამართლო განჩინების საფუძველზე, კომპლექსურად ჩატარებული ოპერატიულ-საგამოძიებო ღონისძიებების შედეგად, 1980 წელს დაბადებული ლ.ჩ., 1977 წელს დაბადებული დ.ბ., 1973 წელს დაბადებული ნ.ბ. და 1980 წელს დაადებული ნ.კ. გამოძალვისა და თავისუფლების უკანონო აღკვეთის ბრალდებით დააკავეს.