ლიტვის საგარეო საქმეთა მინისტრი სამდღიანი ოფიციალური ვიზიტის ფარგლებში დღეს ზუგდიდში იმყოფებოდა. ლინას ლინკევიჩუსმა ევროკავშირის სადამკვირვებლო მისიასთან ერთად დღეს დილით ზუგდიდის მუნიციპალიტეტის სოფელ ხურჩას ეწვია და აფხაზეთ-სამეგრელოს ადმინისტრაციულსაზღვარზე ხურჩა ნაბაკევის გაუქმებული ე.წ საკონტროლო გამშვები პუნქტი დაათვალიერა.
ხურჩიდან ლიტვის საგარეო საქმეთა მინისტრი სამეგრელო-ზემო სვანეთის გუბერნატორთან და ევროკავშირის სადამკვირვებლო მისიის წარმომადგენლებთან ერთად ენგურის ხიდზე გაემგზავრა. ლინას ლინკევიჩუსმა საოკუპაციო ხაზთან ახლოს რუსული ოკუპაცია დაგმო და განაცხადა, რომ რუსეთს მეზობელი ქვეყნის ტერიტორიები აქვს დაპყრობილი.
სამეგრელო-ზემო სვანეთის გუბერნატორის ლევან შონიას განცხადებით, ლიტვის პირველი დიპლომატი ე.წ საკონტროლო-გამშვები პუნქტების დახურვით დაინტერესდა. მისივე თქმით, მან ლინას ლინკევიჩუსს რეგიონის განვითარებაზე, მიმდინარე და დაგეგმილ ინფრასტრუქტურულ პროექტებზეც მიაწოდა ინფორმაცია.
ლიტვის საგარეო საქმეთა მინისტრის განცხადებით, საერთაშორისო თანამეგობრობა ოკუპირებული ტერიტორიების არაღიარების პოლიტიკას გააგრძელებს მანამ, სანამ სიტუაცია არ მოგვარდება.