,,ვენეციის კომისიამ მიწასთან გაასწორა ოლიგარქის ე.წ. კონსტიტუციური ცვლილებები. ''- ასე ეხმაურებიან სოციალურ ქსელში ვენეციის კომისიის წინასწარ დასკვნას საქართველოს კონსტიტუციაში დაგეგმილ ცვლილებებთან დაკავშირებით.
პარლამენტის იურიდიულ საკითხთა კომიტეტის თავმჯდომარე ეკა ბესელია იხტიბარს არ იტეხს , მაგრამ ირიბად აღიარებს, რომ ხელისუფლების ნაქები ცვლილებები გადახედვას საჭიროებს.
,,ვენეციის კომისიის რეკომენდაციებთან დაკავშირებით გუნდში მუშაობა გაიმართება – გვაქვს მზაობა, მივიღოთ სამართლიანი გადაწყვეტილებები, -. განუცხადა ეკა ბესელიამ ჟურნალისტებს – ვენეციის კომისიის სხდომა დანიშნულია 16 ივნისს. მას პარლამენტის თავმჯდომარე დაესწრება. განხილული იქნება რამდენიმე პრინციპული საკითხი. ერთ-ერთი იქნება საარჩევნო სისტემა ბონუსებთან დაკავშირებით. შემდეგ გვექნება დამატებითი კონსულტაციები. საბოლოოდ, როგორც ფორმულირდება ვენეციის კომისიის მოსაზრებები, იმის შესაბამისად გვექნება კონსულტაციები, რათა არ იყოს პრინციპული წინააღმდეგობა. ვენეციის კომისიის წინასწარ მოსაზრებებში არ არის უარყოფითი შეფასება – არის დასაბუთებულობის მეტი მოთხოვნა“, – აცხადებს ეკა ბესელია.
ვენეციის კომისიის წინასწარი დასკვნა გუშინ გახდა ცნობილი. დოკუმენტის მიხედვით, კომისიას საკონსტიტუციო ცვლილებებთან დაკავშირებით მთელი რიგი შენიშვნები და რეკომენდაციები აქვს.