დიდი ბრიტანეთის პრემიერ-მინისტრი ტერეზა მეი გადადგომას არ აპირებს, მიუხედავად იმისა, რომ „კონსერვატიულმა პარტიამ“ ვადამდელი საპარლამენტო არჩევნების შედეგად პარლამენტში უმრავლესობა დაკარგა.-  აღნიშნულის შესახებ BBC და Sky News წყაროებზე დაყრდნობით იუწყებიან. 

 

დიდი ბრიტანეთის ოპოზიციური, „ლეიბორისტული პარტიის“ ლიდერმა ჯერემი კორბინმა ვადამდელი საპარლამენტო არჩევნების წინასწარი შედეგების გამოცხადების შემდეგ, პრემიერ-მინისტრს ტერეზა მეის გადადგომისკენ მოუწოდა.

„პრემიერ-მინისტრმა ვადამდელი არჩევნები დანიშნა, ვინაიდან ახალი მანდატის მიღება სურდა. ის, რაც მან მიიღო „კონსერვატორების“ დაკარგული ადგილები და ხმებია, დაკარგული მხარდაჭერაა. ვფიქრობ, ეს საკმარისია, რათა ის გადადგეს“, – განაცხადა ჯერემი კორბინმა. 

 

დიდ ბრიტანეთში გუშინ გამართულ ვადამდელ საპარლამენტო არჩევნებში, წინასწარი შედეგებით, „კონსერვატორებმა“ 309 ადგილი მიიღეს. მიუხედავად გამარჯვებისა, მათ  ვერ შეძლეს აბსოლუტური უმრავლესობის მოპოვება. მეორე ადგილზე 258 მანდატით „ლეიბორისტული პარტია“ გავიდა.