საქართველოს მოქალაქე, 21 წლის ხვიჩა წყაროზია, რომელიც რუსეთის საოკუპაციო ძალებმა ე.წ. საზღვრის უკანონო კვეთის ბრალდებით მიმდინარე წლის 9 მაისს დააკავეს, გათავისუფლებულია.
შერიგებისა და სამოქალაქო თანასწორობის საკითხებში საქართველოს სახელმწიფო მინისტრის აპარატის ინფორმაციით ხვიჩა წყაროზია ამჟამად საქართველოს ცენტრალური ხელისუფლების მიერ კონტროლირებად ტერიტორიაზე იმყოფება.
წყაროზიას ე.წ. “საზღვრის უკანონოდ გადაკვეთა” ედებოდა ბრალად. რამდენიმე დღის წინ დაკავებულის მამა ( იხ. ფოტო) გალის შეხვედრის მონაწილე ქართული დელეგაციის წევრებს შეხვდა და შვილის დაკავების თაობაზე დეტალური ინფორმაცია მიაწოდა.
მამა აცხადებდა, რომ შვილის გათავისუფლების სანაცვლოდ მოსთხოვეს 50 ათასი რუბლის ექვივალენტი დოლარებში. ოჯახმა მხოლოდ 30 ათასი რუბლის ექვივალენტის შეგროვება შეძლო და ოკუპანტებს გადასცა. როგორც იგი ამბობს, დანარჩენი ნაწილის ნაცვლად კი ერთ-ერთი აფხაზი ე.წ. დეპუტატის სახლის სარემონტო სამუშაოებში მონაწილეობა მოსთხოვეს.