მთავრობის ადმინისტრაციასთან აზერბაიჯანელი ჟურნალისტის, აფგან მუხთარლის მხარდამჭერი აქცია გაიმართა. აქციის მონაწილეებმა სოლიდარობა გამოუცხადეს აზერბაიჯანელ ჟურნალისტს და განაცხადეს, რომ მისი დაკავება და საქართველო-აზერბაიჯანის საზღვარზე გადაყვანა უკანონოდ და შესაბამისი წესების დარღვევით მოხდა. აქციის მონაწილეებმა მოუწოდეს საქართველოს მთავრობას, დროულად გამოავლინონ ქართული მხარის მიერ წესების დამრღვევი პირები და უმკაცრესად დასაჯონ. აქციის მონაწილეებს მთავრობის ადმინისტრაციასთან სიმბოლურად მიტანილი ჰქონდათ პოლიეთილენის პარკები, რომლებიც თავზე ჰქონდათ ჩამოცმული. მათი თქმით, აღნიშნული ქმედება გამოხატავს იმას, თუ როგორ მოხდა აზერბაიჯანელი ჟურნალისტის აფგან მუხთარლის საზღვარზე გადაყვანა. საპროტესტო აქციაში მონაწილეობდნენ ჟურნალისტები, ასევე არასამთავრობო და უფლებადაცვითი ორგანიზაციების წარმომადგენლები.