დღეს ბაქოში აზერბაიჯანელი ჟურნალისტის აფგან მუხთარლის სასამართლო პროცესი გაიმართება.
აფგან მუხთარლის ბრალდება ორი მუხლით აქვს წაყენებული: საზღვრის უკანონო გადაკვეთისა და დიდი ოდენობთ უცხოური ვალუტის კონტრაბანდისთვის. აზერბაიჯანის კანონმდებლობით, საზღვრის უკანონო გადაკვეთისთვის 3 წლამდე პატიმრობაა, ხოლო კონტრაბანდის მუხლით 5 წლამდე პატიმრობაა გათვალისწინებული.
ამ ეტაპზე ბრალდების მხარე 3-თვიანი წინასწარი პატიმრობის შუამდგომლობას აყენებს – ამბობს ჟურნალისტის ადვოკატი ელჩინ ნამაზოვი – დაცვის მხარე კი გირაოთი გამოშვებას ითხოვს.
მუხთარლის გატაცება თბილისში, მის სახლთან მოხდა. ადვოკატი ჟურნალისტის დაკავებასა და გატაცებას პოლიტიკურ ასპექტს და ჟურნალისტის ოპოზიციურ საქმიანობას უკავშირებს.
,,საქართველოს ხელისუფლების მხრიდან თანამშრომლობის გარეშე აფგან მუხთარლის აზერბაიჯანში გადაყვანა ვერ განხორციელდებოდა,ჩემი მეუღლეს პასპორტი თან არ ჰქონია, თბილისში, სახლში აქვს.მივმართავ ქართველ სამართალდამცველებს კითხვით: „როგორ შეიძლება ადამიანმა სახელმწიფო საზღვარი პასპორტის გარეშე გადაკვეთოს?“ – აცხადებს აზერბაიჯანელი ჟურნალისტის მეუღლე ლეილა მუსტაფაევა. მისი თქმით ეჭვებს აძლიერებს ის, რომ ქართველი სამართალდამცველები არ აწვდიან მას ვიდეოჩანაწერს იმ ადგილიდან, სადაც აფგან მუხთარლის დაკავება მოხდა და არც მისი აყვანის ადგილს ასახელებენ.
აზერბაიჯანელი ოპოზიციონერი ჟურნალისტი თბილისში გუშინ გაუჩინარდა. მოგვიანებით აღმოჩნდა, რომ ის აზერბაიჯანში იმყოფება. როგორც თავად აცხადებს, ის საცხოვრებელ სახლთან უცნობმა პირებმა დააკავეს, სცემეს და ბაქოში წაიყვანეს. მისივე მტკიცებით, პირებმა, რომლებიც სავარაუდოდ სპეცსამსახურების წარმომადგენლები იყვნენ, თანხაც ჩაუდეს.