სააგენტო „თურანი“ ადვოკატ ელჩინ სიდიგოვზე დაყრდნობით იუწყება, რომ საბაილსკის რაიონულმა სასამართლომ აზერბაიჯანელ ჟურნალისტ აფგან მუხტარლის სამთვიანი წინასწარი პატიმრობა შეუფარდა. მუხტარლიმ განაცხადა, რომ სასაზღვრო პოსტზე მიყვანამდე მას მესაზღვრე არ უნახავს. ადვოკატის ინფორმაციით, მუხტარლიმ თქვა, რომ პირებს, ვინც ის დააკავა, საქართველოს კრიმინალური პოლიციის ფორმები ეცვათ. მისივე თქმით, როდესაც ავტომანქანა საქართველო-აზერბაიჯანის საზღვარს მიუახლოვდა, ჟურნალისტის თანმხლებმა პირებმა ვიღაცას მოახსენეს, რომ „მოლა ჩამოდის და გენერალს შეუძლია მოვიდეს ქელეხზე“.ადვოკატის განცხადებით, დაცვის მხარე ჟურნალისტის დაპატიმრებას გააპროტესტებს. სააგენტოს ინფორმაციით, სასამართლოსთან ჟურნალისტს სამოქალაქო აქტივისტების დიდი ჯგუფი აპლოდისმენტებით მიესალმა.აზერბაიჯანელი ოპოზიციონერი ჟურნალისტი თბილისში გუშინ გაუჩინარდა. მოგვიანებით აღმოჩნდა, რომ ის აზერბაიჯანში იმყოფება. როგორც თავად აცხადებს, ის საცხოვრებელ სახლთან უცნობმა პირებმა დააკავეს, სცემეს და ბაქოში წაიყვანეს. მისივე მტკიცებით, პირებმა, რომლებიც სავარაუდოდ სპეცსამსახურების წარმომადგენლები იყვნენ, თანხაც ჩაუდეს.