,,ჩვენ მოთმინებით ველოდებით იმ დღეს, როდესაც ალიანსი გადაწყვეტს გახდეს უფრო ძლიერი საქართველოს გაწევრიანებით – განაცხადა გიორგი მარგველაშვილმა ნატოს საპარლამენტო ასამბლეის სხდომაზე. – ქართული საზოგადოება პოლიტიკოსებს ნათლად უკვეთავს ევროატლანტიკურ არჩევანს, მეტ დემოკრატიას, მედიის მეტ თავისუფლებას, უფრო ხარისხიან სასამართლოს და ყოველივე ეს უმნიშვნელოვანესია, რომ გატარდეს ყოველდღიურ ცხოვრებაში''
გიორგი მარგველაშვილმა სიტყვით გამოსვლისას ყურადღება გაამახვილა ქვეყნის საგარეო კურსზე და მისწრაფებებზე და ისუბრა საქართველოს კონსტიტუციაში დაგეგმილ ცვლილებებზეც.
პრეზიდენტის განცხადებით, „ეს დღე მალე იქნება და ამის შემდეგ როგორც საქართველო, ასევე ალიანსი იქნება უფრო ძლიერი, უფრო მდგრადი, უფრო მტკიცე თავის რიგებში“.
„ძალიან მნიშვნელოვანია ის პროცესი, რომელიც ამ ეტაპზე მიმდინარეობს ჩვენს საზოგადოებაში. ჩვენ ვმუშაობთ კონსტიტუციის ახალ ვერსიასთან დაკავშირებით და დარწმუნებული ვარ, რომ ეს პროცესი კიდევ უფრო კონსოლიდირებულს გამოიყვანს ქართულ საზოგადოებას სწორედ იმის ხარჯზე, რომ იქნება ღრმა და ყოვლისმომცველი დიალოგი ერთმანეთთან. აუცილებელია შენარჩუნდეს ის მაღალი სტანდარტი მედიის თავისუფლების, რომელიც არის საზოგადოებაში. აუცილებელია, ჩვენ შევქმნათ მართლაც თავისუფალი და დამოუკიდებელი სასამართლო. უმნიშვნელოვანესი, რაც ამ თვალსაზრისით არსებობს, არის ქართული საზოგადოების ძალიან ნათელი შეკვეთა, რომელიც პოლიტიკოსებმა სწორად უნდა აღვიქვათ და "გადავიტანოთ ყოველდღიურ ცხოვრებაში – განაცხადა პრეზიდენტმა.
ასამბლეაზე სიტყვით გამოვიდნენ საქართველოს პარლამენტის თავმჯდომარე და პრემიერმინისტრიც.