ოკუპირებული გალის რაიონის სოფელ მეორე ოტობაიაში აფეთქება მოხდა. – ,,როგორც ,,ოდიში ნიუსს'' საკუთარმა წყარომ აცნობა, წუხელ ღამის სამ საათზე მეორე ოტობაიას ე.წ. გამგებელს ვიტალი სოროკინს, რომელსაც ადგილობრივი მკვიდრის შოთა გითოლენდიას სახლი აქვს დასაკუთრებული, ფანჯარაში ხელყუმბარა შეუგდეს.
ჩამსხვრეულია საცხოვრებელი სახლის ფანჯრები, დაზიანებულია ერთი ოთახი. მომხდარის შედეგად, არავინ დაშავავებულა. როგორც ადგილობრივები ამბობენ, სოროკინს არანაირი დაზიანება არა აქვს მიღებული, ხოლო მის გარდა ამ სახლში არავინ ცხოვრობს – სახლის პატრონი დევნილია და ოჯახთან ერთად წლებია თბილისში იმყოფება.
მომხდართან დაკავშირებით ადგილობრივ მოსახლეობაში გავრცელდა რამდენიმე ვერსია – სოროკინს თავად აუფეთქდა ხელყუმბარა ან შეგნებულად მოახდინა მისი აფეთქება, რომ ყურადღება მიიპყროს. არის ვერსია, რომ სოროკინს ხელყუმბარა ფანჯრიდან შეუგდეს – მოსახლეობა უპირატესად ამ ბოლო ვერსიას იზიარებს და მომხდარს კლანურ გარჩევებს მიაწერს.
მეორე ოტობაიაში წუხელვე მივიდნენ ოკუპირებული აფხაზეთის ე.წ. მილიციის, რუსეთის „ეფ-ეს-ბეს“ წარმომადგენლები და გალის ე.წ. ადმინისტრაციის წარმომადგენლები. აღძრულია სისხლის სამართლის საქმე.