საქართველოს პარლამენტის წევრი „პატრიოტთა ალიანსიდან“ გელა მიქაძე, რომელსაც არაბთა გაერთიანებული საემიროების სასამართლომ 15 წლით პატიმრობა დაუსწრებლად მიუსაჯა, განაჩენს პოლიტიკურ დევნად აფასებს და ღირსების შელახვაზე დავას და მორალური ზიანის ანაზღაურების მოთხოვნას გეგმავს.
"სისხლის სამართლის საქმესთან დაკავშირებით გავიგე გუშინ ტელევიზიით. მე ელემენტარული უწყება მაინც უნდა ჩამბარებოდა, რომ ამეყვანა იმ ქვეყანაში ადვოკატი.
აუცილებლად შევიტან სარჩელს მორალური ზიანის ასანაზღაურებლად. მე მზად ვარ მსოფლიოს ნებისმიერი ქვეყნის სასამართლოში, სადაც არსებობს სამართალი, ეს ინგლისი იქნება, შვეიცარია, საფრანგეთი, ნებისმიერ სასამართლოში, გავაგრძელო ბრძოლა''- განაცხადა გელა მიქაძემ.
საქმე ეხება ფოთის საზღვაო პორტისა და ახლად შექმნილი კომპანიის, შპს Raystar Trade-ს შორის ერთობლივი საწარმოს შექმნის შესახებ შეთანხმების დადებას და შემდეგ მის გაუქმებას (2010-2011 წლები). მისი თქმით, ის იყო კომპანიის 50%-იანი წილის მფლობელი გიორგი ჯანაშიასთან ერთად, რაც შემდეგ კომპანია რაკიას მიჰყიდა. წილის ღირებულებამ კი 17 მილიონი შეადგინა. პატრიოტთა ალიანსის წევრი ამბობს, რომ მისთვის უცნობია, რა გახდა კომპანია რაკიასთვის წლების შემდეგ დავის მიზეზი. მან არაბული კომპანია რაკიას მფლობელთან, რამდენიმე საქმე უკვე მოიგო.
არაბთა გაერთიანებულ საემიროებში რას ალ ხაიმას სისხლის სამართლის სასამართლომ RAKIA-ს ყოფილ ხელმძღვანელს. ხატერ მასაადსა და RAKIA-ს ორ ყოფილ აღმასრულებელ პირს, გელა მიქაძესა და გიორგი ჯანაშიას დაუსწრებლად 15 წლით პატიმრობა მიუსაჯა ფულადი სახსრების მითვისებისთვის. აღნიშნულის შესახებ Gulf Business იუწყება.
პატიმრობის განაჩენთან ერთად, მასაადმა, ასევე გელა მიქაძემ და გიორგი ჯანაშიამ, რომლებიც RAKIA Georgia-ში მუშაობდნენ, ჯარიმის სახით 17,2 მილიონი აშშ დოლარი უნდა გადაიხადონ. სასამართლოს განაჩენის თანახმად, გელა მიქაძემ უნდა აანაზღაუროს 12,8 მილიონი აშშ დოლარი, ხოლო გიორგი ჯანაშიამ – 4,4 მილიონი აშშ დოლარი. ეს ის თანხაა, რომლის მთვისებაში მათ ბრალი ედებოდათ.
ვერდიქტში მოსამართლემ სამეჰ ჰამედ შაქერმა განაცხადა, რომ სამივე მსჯავრდებულმა განზრახ მიაყენა ზიანი Ras Al Khaimah Investment Authority-ის ფულად სახსრებსა და ინტერესებს.