ბერლინში ვენეციის კომისიის ექსპერტებთან ორდღიანი შეხვედრები იწყება. შეხვედრებს გერმანელი და ბრიტანელი სპეციალისტებიც დაესწრებიან. ქართულ დელეგაციას პარლამენტის თავმჯდომარე ხელმძღვანელობს. ირაკლი კობახიძე კონსტიტუციის პროექტს ევროპელ ექსპერტებს მუხლობრივად გააცნობს. ბერლინში იმყოფებიან ოპოზიციონერები, რომლებმაც საკონსტიტუციო კომისია დატოვეს, "ნაციონალური მოძრაობის" წევრი სალომე სამადაშვილი და პრეზიდენტის საპარლამენტო მდივანი ანა დოლიძე.
საკონსტიტუციო ცვლილებების პროექტის საჯარო განხილვა დამატებით თბილისის 10 რაიონში და საქართველოს 10 მუნიციპალიტეტში იმართება.
საჯარო განხილვა 5 მაისს დაიწყო. ცვლილებები სულ 11 ქალაქში უნდა წარედგინათ. ბოლო შეხვედრა 15 მაისს თბილისში ჩაიშალა.
საკონსტიტუციო ცვლილებების პროექტი პარლამენტში 1 მაისს დარეგისტრირდა. პროექტს "ქართული ოცნების" 108 დეპუტატი აწერს ხელს. საკონსტიტუციო კომისიამ სამუშაო ვერსიის მუხლებს და ალტერნატიულ წინადადებებს მხარი 22 აპრილს დაუჭირა (43 მომხრე, 8 წინააღმდეგი). პროექტი ვენეციის კომისიას გადაეგზავნა. ცვლილებები პარლამენტის საშემოდგომო სესიაზე დამტკიცდება. საკონსტიტუციო კომისია 4 თვის განმავლობაში მუშაობდა. პროცესში მონაწილეობაზე თავიდანვე უარი თქვა პრეზიდენტის ადმინისტრაციამ. საკონსტიტუციო კომისია ბოლო ეტაპზე პროტესტის ნიშნად დატოვა ოპოზიციამ. მათი შეფასებით, მმართველმა გუნდმა პროექტი საკუთარ ინტერესებს მოარგო.
პროექტის მიხედვით: პრეზიდენტს საარჩევნო კოლეგია ირჩევს, მაჟორიტარული სისტემა უქმდება, ოჯახის დეფინიცია განისაზღვრება, გენერალურ პროკურორს პარლამენტი ამტკიცებს, მოსამართლეების წარდგენა-დანიშვნაში პრეზიდენტის უფლებები იზღუდება, ევროპულ და ევროატლანტიკურ სტრუქტურებში ინტეგრაცია ჩაიწერება, პარლამენტის ადგილსამყოფელი განსაზღვრული არ არის.