პარლამენტის ადამიანის უფლებათა დაცვის კომიტეტის თავმჯდომარის, სოფო კილაძის განცხადებით, ახლა, როდესაც შსს-ს მოსკოვის ყოფილი მერის, იური ლუჟკოვის მიერ "ოკუპირებული ტერიტორიების შესახებ" კანონმდებლობის დარღვევის თაობაზე აქვს ინფორმაცია, შესაბამისი ზომები გატარდება. კილაძემ კომენტარი "ინტერპრესნიუსთან" გააკეთა.
"მე რამდენადაც ვიცი, საზღვარზე არ იყო ცნობილი ის, რომ ამ პიროვნებას "ოკუპირებული ტერიტორიების შესახებ" კანონმდებლობა დარღვეული ჰქონდა და ახლა, როდესაც შსს-ს ამის შესახებ ინფორმაცია უკვე აქვს, ბუნებრივია, შესაბამისი ზომები გატარდება. ეს შსს-ს გადასაწყვეტია – უწყების, რომელიც ამ საკითხზე მუშაობს",- განაცხადა სოფო კილაძემ.
შეგახსენებთ, რომ შინაგან საქმეთა მინისტრის მოადგილე, შალვა ხუციშვილი, მოსკოვის ყოფილი მერის, იური ლუჟკოვის საქართველოში ვიზიტს დღეს გამოეხმაურა.მისი თქმით, წინასწარი მონაცემებით, ლუჟკოვი საქართველოში ლეგალურად შემოვიდა და მას საბაჟოზე წარდგენილი დოკუმენტები წესრიგში ჰქონდა.
მოსკოვის ყოფილი მერი, იური ლუჟკოვი, საქართველოში მეუღლესთან ერთად ჩამოვიდა და იმის მიუხედავად, რომ საქართველოს კანონი "ოკუპირებული ტერიტორიების შესახებ" ბევრჯერ აქვს დარღვეული, საზღვარი უპრობლემოდ გადმოლახა.