რუსეთის ხელისუფლება მძიმედ განიცდის მარი ლე პენის დამარცხებას საფრანგეთის საპრეზიდენტო არჩევნებში, რაც ფაქტობრივად ევროკავშირის მომხრეთა გამარჯვებას ნიშნავს.
„პირველად საფრანგეთის საპრეზიდენტო არჩევნები ჩატარდა როგორც ევროკავშირისადმი დამოკიდებულების თაობაზე რეფერენდუმი. ევროკავშირის მომხრეებმა გაიმარჯვეს, მაგრამ ფრანგების ერთ მესამედზე მეტი წინააღმდეგია. ასეთი საფრანგეთში ჯერ არ მომხდარა“, – ასეთი კომენტარი გააკეთა რუსეთის ფედერაციის საბჭოს სენატორმა ალექსეი პუშკოვმა ემანუელ მაკრონის საფრანგეთის პრეზიდენტად არჩევასთან დაკავშირებით „ტვიტერის“ პირად გვერდზე.
მან ასევე დაასახელა ის ლიდერები, ვისაც მაკრონის პრეზიდენტად არჩევა გაუხარდა.
„მაკრონის გამარჯვებით აღფრთოვანებულნი არიან: კლინტონი, ობამა, მერკელი, პოროშენკო, ჯონსონი. შეიძლება არ გავაგრძელოთ ეს სია. ყველაფერი ნათელია. მითხარი ვინ არის შენი მეგობარი“, – დასძინა რუსმა სენატორმა.