დეკანოზ გიორგი მამალაძის სასამართლო პროცესი დახურულ რეჟიმში მიმდინარეობს.
გაჟღერდა ინფორმაცია, რომ შუამდგომლობაში პროცესის დახურვის არგუმენტად მოყვანილია მისწრაფება, არ შეილახოს საპატრიარქოს იმიჯი.
,,პროცესის დახურვის იმ არგუმენტების გამოყენება, რომ საპატრიარქოს იმიჯი შეიძლება შეილახოს, საპატრიარქოსთვის კატეგორიულად მიუღებელია, საქართველოს საპატრიარქო და მართლმადიდებელი ეკლესია ყოველგვარი განსაცდელის ჟამს უფრო და უფრო ძლიერდება, – განაცხადა ამასთან დაკავშირებით საპატრიარქოს იურისტმა ედიშერ ქარჩავამ სასამართლო პროცესის დახურვის შემდეგ – , საპატრიარქოს არაფერი აქვს დასამალი და შუამდგომლობის წაყენებისას მხარეთა მიერ ამ არგუმენტის მოშველიება, ჩვენთვის მიუღებელია. შემიძლია დაგიდასტუროთ, რომ საქართველოს საპატრიარქოდან არ ყოფილა არანაირი მითითება და თხოვნა, რომ დავუშვათ რაიმე უნდა იყოს დასამალი. ამ საქმეში ისედაც ყველაფერი ნათელია. მხარეები გარკვეულწილად გარემოებებზე საუბრობენ და თუნდაც წინასასამართლო სხდომა არ წარმოადგენს ისეთი განხილვის ეტაპს, სადაც შეიძლება გარკვეული პირები დაიკითხოს, ან გარკვეული მტკიცებულებები იყოს გამოკვლეული. აქედან გამომდინარე, ჩემთვის, აპელირება და გადაბრალება საქართველოს საპატრიარქოზე, რომ თურმე მის ინტერესებში შედის პროცესის დახურვა, კატეგორიულად მიუღებელია“- განაცხადა ედიშერ ქარჩავამ.
თავის მხრივ, ე.წ. ციანიდის საქმეზე ბრალდებულმა მამა გიორგი მამალაძემ დღევანდელ პროცესზე განაცხადა, რომ არ ეთანხმება.პროკურატურის არგუმენტს, რომ სხდომის დახურვა თუნდაც მის პირად ცხოვრებასთან დაკავშირებული საკითხების გამო უნდა მოხდეს:
,,ჩემი სურვილია სხდომები იყოს ღია, საუბარი იყო ჩემს პირად ცხოვრებაზეც და მე მგონი, აქ ჩემი პირადი ცხოვრება არ განიხილება. ჩვენ განვიხილავთ ბრალდებას და ამასთან დაკავშირებით მე დასამალი არაფერი მაქვს '' – განაცხადა მან