„ნუ გეშინიათ, არ შემოვიდნენ“ – ამ მოკლე და შეურაცხმყოფელი კომენტარით გამოეხმაურა შინაგან საქმეთა მინისტრი გიორგი მღებრიშვილი საქართველოში პუტინის ბაიკერების არშემოშვების ფაქტს.
მოსახლეობის მძაფრი რეაქციის ახსნა შიშით არაპირდაპირ, მაგრამ საკმაოდ მკაფიოდ მეტყველებს იმაზე, რომ მინისტრი თავისი ,,ძველბიჭური ლექსიკით'' ვერ წვდება ამ პროტესტის არსს, რომლის მამოძრავებელია არა ,,ღამის მგლებისადმი'' შიში, არამედ სულისკვეთება – არ შემოვუშვათ საქართველოში კრემლის მოტოციკლისტები.
ასეა თუ ისე, რუსი ბაიკერები ლარსის საზღვრიდან თავიანთ ქვეყანაში გააბრუნეს. მღებრიშვილს არ განუმარტავს, როგორ არის ფორმულირებული მათთვის საქართველოში არშემოშვების მიზეზი, კანონის რომელი მუხლით იხელმძღვანელეს სამართალდამცველებმა და იყო თუ არა ამის მიზეზი რუსების მიერ საქართველოს ტერიტორიების ოკუპირება.
მესაზღვრეების მიერ მიღებული გადაწყვეტილება მინისტრის მოადგილემ, შალვა ხუციშვილმა განმარტა და აღნიშნა, რომ მათ უცხოელთა და მოქალაქეობის არმქონე პირთა სამართლებრივი მდგომარეობის შესახებ კანონის 11-ე მუხლით იხელმძღვანელეს.
როგორც ხუციშვილი აცხადებს, ბაიკერებმა ვერ დააკმაყოფილეს ამ მუხლით გათვალისწინებული ნორმები და ვერ გასცეს სათანადო პასუხი ქვეყანაში შემოსვლის მიზნებსა და იმ მიმართულებაზე, საითაც ისინი მიდიოდნენ.
შეგახსენებთ, გუშინ რუსული გამოცემა auto.mail.ru-მ გაავრცელა ინფორმაცია, რომ ქართველმა მესაზღვრეებმა რუს ბაიკერებს საქართველოში შემოსვლის უფლება არ მისცეს 50 რუს ბაიკერს და ახსნა-განმარტებების გარეშე, პასპორტში ჩაურტყეს შტამპი "ანულირებულია"
პირველი ცნობა საზღვარზე მომხდარის შესახებ გუშინ ბაიკერმა დიმიტრი ხრიპკოვმა გაავრცელა სოციალურ ქსელში საკუთარ გვერდზე – ,, მაისის დღესასწაულების ბოლომდე მოტოციკლისტებისთვის საქართველოს საზღვარი დაკეტილია და ვინც საზღვარზე დგახართ, დაბრუნდით ვლადიკავკაზში.''- მოუწოდა მან მეგობარ ბაიკერებს.