„ერთიანი ნაციონალური მოძრაობის“ ზუგდიდის ორგანიზაციის წევრებმა და მხარდამჭერებმა დღეს ხურჩაში საოკუპაციო ხაზის გადმოწევა გააპროტესტეს. შეკრებილების განცხადებით, რუსეთის ხელისუფლება აგრძელებს მცოცავ ოკუპაციას. ისინი მოუწოდებენ ევროკავშირს, ხელისუფლებას მიიღოს საჭირო ზომები, რადგან ადგილობრივ მოსახლეობას შიშით უწევს ცხოვრება. ნაციონალური მოძრაობის წევრების განცხადებით, ის რაც ხდება საზღვრებთან მიმართებაში მთავრობის უნიათო მუშაობის შედეგია.
„ სოფელ ხურჩაში საოკუპაციო ხაზთან დაკავშირებით არის უმძიმესი მდგომარეობა. ოკუპანტი მცოცავ ოკუპაციას განაგრძობს. ჩვენ ვესაუბრეთ მოსახლეობას და გვითრხრეს, რომ მათ რამდენიმე ჰექტარი მიქა აქვთ მითვისებული, ანუ მონიშვნეს თავიანთი საოკუპაციო ხაზი. ხურჩის მოსახლეობა თავს დაუცველად გრძნობს. ჩვენ მოვუწოდებთ ხელისუფლებას, ევროკავშირს მიიღონ ზომები, რადგან, როგორც მოსახლეობა გვეუბნება არავითარი ზომები არ არის მიღებული ამ დრომდე. მათ ამ დრომდე რისკის ქვეშ უწევთ ცხოვრება“ – განაცხადა ჟურნალისტებთან საუბრისას „ერთიანი ნაციონალური მოძრაობის“ პოლიტსაბჭოს წევრმა ალექსანდრე ქობალიამ.
„ხურჩის მოსახლეობა თავს მიტოვებულად გრძნობს. ერთ-ერთმა მოხუცმა გვითრა, რომ მათ უთხრეს, საერთოდ არ გადმოწეულა საზღვრები, თუმცა ყველამ იცის თუ სად იყო საზღვრები ნაბაკევს, შამგონასა და ხურჩას შორის. ერთ-ერთმა მოხუცმა გვითხრა, რომ არათუ ხუთი, არამედ ათი ჰექტარი მიწაა მიტაცებული და ეს არის სწორედ ამ ხელისუფლების უნიათობის შედეგი“ – განაცხადა „ერთიანი ნაციონალური მოძრაობის წევრმა მაია კალანდიამ.
გალის რაიონის სოფელ ნაბაკევის მოსაზღვრე ზუგდიდის სოფელ ხურჩაში რუსმა სამხედროებმა საოკუპაციო საზღვარი გადმოსწიეს. შედეგად ხურჩელი ომარ მიქაუტაძის და არველოდ ნაჭყებიას 2-ჰექტრამდე სასოფლო-სამეურნეო მიწის ნაკვეთი ოკუპირებულ ტერიტორიას შეუერთდა. ხურჩის გამგებელი ადასტურებს, რომ ე.წ. რუსი მესაზღვრეების მიერ ტერიტორიის ხის ბოძებით მონიშვნის შედეგად, ხურჩის მოსახლეობის 2 ჰექტრამდე მიწა აფხაზეთის მხარეს მოექცა.
სახელმწიფო უსაფრთხოების სამსახურში საოკუპაციო ზოლზე ბოძების ჩასმას ბორდერიზაციის პროცესის გაგრძელებას უწოდებენ და ამბობენ რომ ე.წ. საზღვრის გადმოწევა არ მომხდარა.