პროექტის „ვესაუბრებით ამომრჩეველებს“ ფარგლებში N67 ზუგდიდის საოლქო საარჩევნო კომისიამ დაიწყო საინფორმაციო კამპანიის წარმოება საზოგადოებრივი თავშეყრის ადგილებში, ქალაქ ზუგდიდის მუნიციპალიტეტისა და ზუგდიდის მუნიციპალიტეტის ტერიტორიაზე. პროექტის მიზანია საოლქო საარჩევნო კომისიასა და ამომრჩევლებს შორის კომუნიკაციის გაძლიერება, საარჩევნო ადმინისტარციის საქმიანობის პოპულარიზაცია, ცესკოს საქმიანობისა და საარჩევნო ადმინისტრაციის მიერ შეთავაზებული სერვისების შესახებ ინფორმაციის მიწოდება, ამომრჩეველთა ცნობიერების ამაღლება 2017 წელს გასამართი ადგილობრივი თვითმართველობის არჩევნების შესახებ. ცესკო მიზნად ისახავს, რაც შეიძლება მეტი მოქალაქე დააინტერესოს, მიაწოდოს შესაბამისი ინფორმაცია არჩევნებში მონაწილეობის მისაღებად და შექმნას მოტივაცია მონაწილეობა მიიღოს არჩევნებში.
პროექტის ფარგლებში, ზუგდიდის საოლქო-საარჩევნო კომისიის ინიციატივით მოეწყო პირველი გასვლითი შეხვედრა ანაკლიის მოსახლეობასთან. საოლქო-საარჩევნო კომისიის ადმინისტრაციამ მათ მიაწოდა ინფორმაცია 2017 წლის ადგილობრივი არჩევნების და ზოგადად, საარჩევნო პროცესის შესახებ. მოსახლეობაში დარიგდა საინფორმაციო ფლაერები, ადგილობრივებმა შეავსეს ამომრჩევლის მოსაზრების ბარათები და მოწვეულ იქნენ საოლქო საარჩევნო კომისიაში საინფორმაციო საჯარო შეხვედრაზე, სადაც მათ შესაძლებლობა ექნებათ დეტალური ინფორმაცია მიიღონ არჩევნებისა და ადმინისტრაციის საქმიანობის შესახებ. მსგავსი შეხვედრები ხელს უწყობს მოსახლეობასთან უფრო მჭიდრო და უშუალო კომუნიკაციას, მათ ინფორმირებას და მათთან მოსაზრებების გაცვლას.