,,აფხაზთა კრების'' ლიდერი მალხაზ პატარაია ჯანდაცვის საპარლამენტო კომიტეტის გუშინდელ სხდომას ეხმაურება.
,,დეპუტატმა ნარჩემაშვილმა ჩვენი შვილებისათვის დევნილის სტატუსის მინიჭებაზე შეიცხადა, რა გვეშველება 15 წელიწადში დევნილები 2 მილიონი რომ გახდებიანო.
შევარდნაძისაგან ჩვენთვის მოსჯილ 25 წელზე მისმა პატრონგამოცვლილმა შეგირდმა თვალის დახამხამებაში კიდევ 15 წელი დაგვიმატა და დევნილთა შობადობის ასტრონომიული პროგნოზიც ზედ გვამცნო. თანაც შემოგვჩივლა, რომ მისი შვილიც დაუსაქმებელია. – წერს მალხაზ პატარაია – საკადრისი პასუხი მან ,,აფხაზთა კრებისაგან“ იქვე მიიღო ისე, რომ მისი თანაპარტიებიც კი ნირწამხდარი ბურტყუნებდნენ, არა ასე არ უთქვამს, სხვა რამის თქმა უნდოდაო.
თავმჯდომარემ სხვა ვერაფერი მოიფიქრა, ჩვენი ერთ-ერთი აქტივისტის გაძევება მოითხოვა და მანდატურები დაახვია. ჩვენც გამოვეყევით ჩვენს დისკვალიფიცირებულ მეგობარს. გასვლისას ,,ღვაწლმოსილ“ გენერალს დევნილებისთვის წყევლა-კრულვაც მოუყოლებია – თქვენ გაწყდითო.
ერთ-ერთი დეპუტატის აჩემებასაც თუ დავუმატებთ, ახმეტიდან რომ გვეყოლოს დევნილები, რა ვქნათო, მეტად ტრაგიკომიკური სხდომა გამოვიდა.
ჩემი დაკვირვებით, სხვა ყველა სხვა ,,სიკეთესთან“ ერთად, ,,ოცნება“ კოლექტიურ კვიციანად გადაიქცა.''- წერს მალხაზ პატარაია.
ჩვენი მხრიდან დავძენთ, რომ დევნილებს ამ ხელისუფლებისაგან ისღა აკლიათ ბავშვების გაჩენა აუკრძალონ – ასე ახლოა ჩინეთი?