ტელეკომპანია „იმედზე“ პოლიტიკური თოქ-შოუ იწყება. გავრცელებული ინფორმაციით, არხის მენეჯმენტის გადაწყვეტილებით, მას ტელეჟურნალისტი ეკა ხოფერია გაუძღვება. აღნიშნულს ადასტურებს ტელეკომპანია „იმედის“ საინფორმაციო სამსახურის უფროსი. ნანა ლეჟავას ინფორმაციით, ჯერ გადაწყვეტილი არ არის კონკრეტულად თუ როდიდან გავა გადაცემა პირდაპირ ეთერში, რადგან დეტალები ამ დროისთვის ზუსტდება.
“ჯერ ვფიქრობთ, რა გადაწყვეტილებას მივიღებთ, ამაზე მოგვიანებით ჩვენვე განვაცხადებთ. ეკა თუ იქნება წამყვანი, ძალიან კარგი იქნება”, -განაცხადა ნანა ალეჟავამ.
კითხვაზე, წამყვანის პოზიციაზე განიხილება თუ არა კიდევ სხვა კანდიდატი, საინფორმაციო სამსახურის უფროსმა განაცხადა, რომ „შიდასამზარეულოზე საუბარი არ სურს“.
რაც შეეხება გადაცემას „ეკა ხოფერიას თოქ-შოუ“, რომელიც ამჟამად იმედზე გადის, ის სავარაუდოდ დაიხურება.
ტელეჟურნალისტი ეკა ხოფერია წლების განმავლობაში სამაუწყებლო კომპანია რუსთავი 2 -ში მუშაობდა, ის არხის საინფორმაციო სამსახურის უფროსი და საღამოს პოლიტიკური თოქ-შოუს ავტორი და წამყვანი იყო. 2006 წელს მან არხი პროტესტის ნიშნად პირდაპირ ეთერში დატოვა, მოგვიანებით კი ტელეკომპანია იმედში განაგრძო მუშაობა.