სანამ საქართველოს რიგი ქალაქები თავიანთი უკვე არსებული სტატუსის მოსალოდნელ გაუქმებას აპროტესტებენ, ჩხოროწყუს მოსახლეობა დაბისთვის ქალაქის სტატუსის მინიჭებას ითხოვს.
ჩხოროწყუს გამგებლის მოადგილის ვალერი თოდუას განცხადებით, საკითხი წლების წინაც იდგა დღის წესრიგში, თუმცა გარკვეული დაბრკოლებების გამო ეს ვერ მოხერხდა.
”თავის დროზე რამდენჯერმე დავაყენეთ ეს საკითხი. თუმცა იყო სხვადასხვა დაბრკოლებები, მათ შორის მიწის ნაკვეთებთან დაკავშირებით, რადგან ქალაქის სტატუსის მქონე დასახლებაში მოსახლეს 600 კვ. მეტრი მიწის ნაკვეთი არ უნდა ჰქონდეს. ახლა ეს პრობლემა მოიხსნა, სხვა მხრივ კი, დაბა ჩხოროწყუ ყველა იმ კრიტერიუმს აკმაყოფილებს, რომელიც ქალაქის სტატუსის მისანიჭებლად არის საჭირო.
7 აპრილს კულტურის სახლში გაიმართება შეხვედრა, ეს იქნება დასკვნითი შეხვედრა მოსახლეობასთან კონსულტაციების შემდეგ, რომელზეც მოხდება ხელმოწერების შეგროვება. ეს ყველაფერი გადაეგზვნება საკრებულოს განსახილველად, უწყების მიერ გადაწყვეტილების მიღების შემდეგ კი, ინფრასტრუქტურის სამინისტროს, რომელიც საკითხს მთავრობის სხდომაზე დააყენებს. თავის მხრივ კი, მთავრობამ შესაბამისი განკარგულება უნდა გამოსცეს თუ ინიციატივას გაიზიარებს”, – განაცხადა ვალერი თოდუამ.