თბილისში, წერეთლის გამზირზე მდებარე გარევაჭრობის ჯიხურების დემონტაჟი ხმაურისა და დაპირისპირების ფონზე მიმდინარეობს – გარემოვაჭრეები ცდილობენ ხელი შეუშალონ მერიის ზედამხედველობისა და დინამო არენის წარმომადგენლებს, ადგილზე მობილიზებულია საპატრულო პოლიცია და მერიის უსაფრთხოების სამსახურები.
"აქ მოხდება მკვლელობა! სახურავს ხელი ვინმემ არ მოკიდოს!" – აცახადებს ერთ-ერთი გარემოვაჭრე რუსთავი 2 – ის ჟურნალისტთან საუბარში.
„მერიამ მოგვცა ნებართვა, უნდა ავიღოთ ეგ რაღაც საძაგლობა აქ რომ დგას, უხეში შენობები, რომელიც არის დინამო არსენას საკუთრება და ამის ნებართვა, ერთი უკვე გავიდა ვადა, მეორეც გასდის უკვე ვადა და ამის საშუალებას არ გვაძლევს აგერ ზოგიერთი რომ აჯანყებს ამ ხალხს,“ – აცხადებს თავის მხრივ დინამო არენას წარმომადგენელი.
დღესვე, აკრძალვის მიუხედავად, მარჯანიშვილის მეტროს მიმდებარე ტერიტორიაზე გარემოვაჭრეებმა, რომელთა დახლები და ჯიხურები ამ რამდენიმე დღის წინათ იქნა აღებული, საკუთარი პროდუქცია მაინც მიიტანეს.
როგორც გარემოვაჭრეები აცხადებენ, მათ დასაკარგი აღარაფერი აქვთ, რადგან იმ შემთხვევაში თუ გარევაჭრობით არ დაკავდებიან, სერიოზული ეკონომიკური პრობლემები ექნებათ.
მარჯანიშვილის მეტროს მიმდებარე ტერიტორიაზე „დემოკრატიის ინსტიტუტის“ ორგანიზებით საპროტესტო აქცია იმართება. აქციის ორგანიზატორები მოითხოვენ, გარევაჭრობის შესახებ კანონპროექტის დროულ განხილვას და ამოქმედებას, რაც კანონპროექტის ინიციატორების განმარტებით, გარევაჭრობას კანონის ფარგლებში მოაქცევს.
მეტროსადგურ მარჯანიშვილის მიმდებარე ტერიტორიაზე იმყოფებიან თბილისის მერიის ზედამხედველობის სამსახურისა და საპატრულო პოლიციის წარმომადგენლები.